Даъвати сармоягузорони бурунмарзӣ ба ҳамоиши байналмилалӣ

Душанбе, 29.08.2016 /АМИТ «Ховар»/. Моҳи октябри соли равон мардуми Тоҷикистон аз дуюмин солгарди таҷлили «Рӯзи соҳибкор» дар кишвар истиқбол менамоянд. Дар доираи таҷлили дуюмин солгарди «Рӯзи соҳибкор» моҳи октябр дар Душанбе «Форуми байналмилалии соҳибкории Душанбе -2016» гузаронида мешавад.
Дар робита ба ин, аз ҷониби Ҳукумати мамлакат нақшаи чорабиниҳо оид ба таҷлили «Рӯзи соҳибкор» тарҳррезӣ гардид, ки он фарогири баргузории маъракаҳои гуногун дар миқёси кишвар аст.
Дар ҳошияи «Рӯзи соҳикбор» нимаи аввали моҳи октябр бо иштироки намояндагони бахши хусусӣ ва олимони соҳа суҳбати «мизи мудаввар» ва семинарҳо гузаронида шуда, натиҷаҳои ислоҳот, таҷрибаи муваффақи соҳибкорӣ ва пайдо намудани роҳҳои рушди соҳибкориву сармоягузорӣ дар кишвар баррасӣ мегарданд.
Инчунин аз ҷониби вазорату идораҳои ҷумҳурӣ гузаронидани озмунҳо дар мавзӯъҳои рушди соҳибкорӣ ва сармоягузорӣ, ташаккули соҳибкории истеҳсолӣ, хусусан маҳсулоти воридотивазкунанда дар заминаи технологияи муосир дар назар аст. Ҳамзамон бо мақсади таҷлили дуюмин солгарди «Рӯзи соҳибкор» дар кишвар, дар минтақаҳои гуногуни ҷумҳурӣ намоишгоҳ-фурӯши маҳсулот ва хизматрасонии соҳибкорону сармоягузорони ватанию хориҷӣ созмон дода мешавад.
Бояд тазаккур дод, ки ба «Форуми байналмилалии соҳибкории Душанбе -2016» Ҳукумати Ҷумҳурии Тоҷикистон меҳмонони хориҷӣ, хусусан соҳибкорону сармоягузорони бурунмарзиро даъват намудааст, ки ҳадаф- саҳм гузоштан дар рушди иқтисодиёти миллии кишвар арзёбӣ мегардад.