Эй зиҳӣ, Дилшод!..

Душанбе, 22.08.2016./АМИТ «Ховар»/. Ба даст овардани медали тилло ва унвони чемпионӣ аз ҷониби гурзандози машҳури тоҷик Дилшод Назаров воқеаи нодир дар арафаи ҷашни бузурги таърихии миллати тоҷик – 25-солагии Истиқлолияти давлатии Ҷумҳурии Тоҷикистон гардид ва ба ҳар хонадони кишвари мо шодию сурур овард. Имрӯз дар суҳбати сари кӯча, гулгашту бозорҳо, маҷлису маҳофил дар ин бора ҳарф мезананд ва сокинони мамлакат якдигарро бо ин ғалабаи ҷаҳоншумул табрику муборакбод мегӯянд. Рассомон нақши Дилшод Назаровро мекашанд, сарояндагон дар васфаш тарона эҷод менамоянд, шоирон шеъру достон меофаранд.
Ба суроғаи «АМИТ Ховар» нахустин шеър бо номи «Эй зиҳӣ, Дилшод!..» дар васфи ғалабаи қаҳрамони олимпӣ Дилшод Назаров ворид шуд, ба қалами рӯзноманигори маъруф ва шоири хушкаломи тоҷик Давлат Сафар тааллуқ дорад.

Давлат Сафар

Эй зиҳӣ, Дилшод…

Ба гурзандози маъруфи тоҷик Дилшод Назаров, ки дар Бозиҳои тобистонаи олимӣ дар Рио-де-Жанейрои Бразилия медали тилло ба даст овард.

Гурзпартоӣ агар аз давраи бобоӣ аст,
Дар нишони худшиносӣ нашъаи лолоӣ аст.
Баъд аз ин, ки дастболо гашт Дилшоди Назар,
Нангу номи Тоҷикистон дар ҷаҳон тиллоӣ аст.

Обрӯ аз оби тиллоист дигар пурҷило,
Худшиносӣ гашт тиллоиву тилло шуд зи мо.
Рўи худ бо оби тилло шуст Дилшоди Назар,
Баъд аз ин хуршед мегирад зи рўи ў зиё

Гурзи Рустам бенишон буду ба дасти мо расид,
Субҳи тиллоии шуҳрат ба сари миллат дамид.
Эй зиҳӣ, Дилшод, аз нанги ватандории ту,
Парчами мо парфишон гардид дар рўзи саид.