Феҳристи номҳои миллии тоҷикӣ ба Ҳукумати ҷумҳурӣ пешниҳод гардидааст

Душанбе, 01.08.2016. /АМИТ «Ховар»/.  «Феҳристи номҳои миллии тоҷикӣ аз ҷониби  мутахассисони  Кумитаи забон  ва истилоҳоти назди  Ҳукумати Ҷумҳурии  Тоҷикистон  таҳия гардида,   ба Ҳукумати Ҷумҳурии Тоҷикистон пешниҳод шудааст.
Ҳадаф аз таҳияи Феҳристи номҳои миллии  тоҷикӣ эҳёи арзишҳои  маънавӣ, сарватҳои бебаҳои таъриху фарҳанги  миллӣ  тавассути  забони миллӣ, инчунин номгузории  суннатии тоҷикӣ мебошад»,- иброз намуд Гавҳар Шарофзода, раиси Кумитаи забон ва истилоҳоти назди Ҳукумати Ҷумҳурии Тоҷикистон.
Феҳристи  номҳои миллии тоҷикӣ  аз ду қисмат иборат буда,  бо рақамгузорӣ пайгирӣ мешавад. Дар қисмати аввали он номҳои  духтарона ва дар қисмати дуввум номҳои писарона  оварда шудаанд. Инчунин бо мақсади  дуруст навиштани  номҳои миллӣ дар ҳуҷҷатгузорӣ  тарзи навишти номҳои духтаронаю писарона бо се забон- тоҷикӣ, русӣ ва англисӣ ҷой дода, ба феҳрист замима шудааст. Фарҳанги  номҳои миллӣ  низ дар ду ҷилд  ба табъ хоҳад  расид.
Гавҳар Шарофзода  афзуд, ки танзими  номгузории шаҳрвандон  дар заминаи меъёрҳои  таърихии номгузории   тоҷикӣ ба фарзандон, ки яке аз арзишҳои   маънавии миллии мо  маҳсуб ёфта,  аз гузаштаи дури  таърихи забонамон сарчашма мегирад ва ҳамеша мавриди  таваҷҷуҳи Ҳукумати  Ҷумҳурии Тоҷикистон қарор  дорад.