Гурӯҳи ҳамсароёни Театри давлатии академии опера ва балет дар фестивали байналмилалӣ санъату ҳунари Тоҷикистонро муаррифӣ карданд

Душанбе, 04.08.2016. /АМИТ «Ховар»/. Ҳунарнамоии гурӯҳи ҳамсароёни Театри давлатии академии опера ва балети ба номи С. Айнӣ дар Фестивали 13-уми байналмилалии гурӯҳҳои хорӣ аз ҷиҳати омодагӣ беҳтарин дониста шуд.
Фестивал дар шаҳри Пекини Ҷумҳурии Мардумии Чин бо иштироки тақрибан 80 гурӯҳи хорӣ ва 10000 аҳли ҳунар аз кишварҳои гуногун идома дорад, вале гурӯҳи ҳамсароёни театри тоҷик бо сабаби омодагӣ ба Ҷашни 25-солагии Истиқлолияти давлатии Тоҷикистон ба Ватан баргаштанд.
Фестивал ба муносибати 15-солагии таъсиси Созмони ҳамкории Шанхай бо ташаббуси Вазорати фарҳанги Ҷумҳурии Мардумии Чин бо мақсади таҳкими ҳамкории фарҳангӣ байни кишварҳои аъзо ва нозир ташкил карда шудааст.
Гурӯҳи ҳамсароёни тоҷик бо роҳбарии директори театр Манучеҳр Шарифзода, роҳбари бадеӣ, Ҳунарпешаи мардумии Тоҷикистон Адҳам Холиқов ва сархормейстери театр Елена Тиллоева сурудҳои халқии ба ҳамсароӣ мувофиқкардашуда, аз ҷумла «Республикаи ман»-и Шарофиддин Сайфиддинов, «Дӯстӣ»-и Талаб Сатторов, «Муҳаббат»-и Зиёдулло Шаҳидиро пешкаши иштирокдорони фестивал намуданд.
Хусусан иҷрои се суруд бо забони чинӣ аз ҷониби ҳамсароёни тоҷик писанди мизбонону меҳмонони фестивал ва сазовори кафкӯбии онон гардид.