Иди асал дар шаҳри Хоруғ

Хоруғ, 19.08.2016./АМИТ «Ховар»/. Беҳтарин занбӯрпарварони  шаҳру навоҳии вилоят имрӯз дар боғи фарҳангию фароғатии шаҳри Хоруғ гирди ҳам омаданд ва маҳсулоти худро ба намоиш ва фурӯш гузоштанд.
Сардори Раёсати кишоварзии  Вилояти Мухтори Кӯҳистони Бадахшон  Назрӣ Назриев гуфт, ки бахшида ба 25- солагии Истиқлолияти давлатии Ҷумҳурии Тоҷикистон чандин бор дар бозори марказӣ намоиш ва фурӯши маҳсулоти кишоварзӣ роҳандозӣ намудем ва ҳоло дар боғи марказии шаҳр Иди асал баргузор кардем. Мутобиқ ба маълумоти оморӣ айни ҳол дар тамоми шаклҳои хоҷагидории вилоят бештар аз  6 ҳазор оилаи занбӯр мавҷуд аст ва сол аз сол  миқдори истеҳсоли ин навъи маҳсулот рӯ ба афзоиш дорад.
Ба гуфтаи як тан занбӯрпарвар аз ноҳияи Дарвоз, ки худро Талабшо Қурбонов муаррифӣ кард, дар шароити кӯҳистон парвариши занбӯри асал ба хонаводаҳо дар таъмини рӯзгор кумаки зиёд мерасонад. Ҳар сокини деҳот ба ҷуз ифои вазифа дар ин ё он соҳа метавонад занбӯри асал парвариш кунад.
Дар ҷамоати Сағирдашти ноҳияи Дарвоз агар 50 қуттӣ дошта бошӣ ва онҳоро дуруст нигоҳубин намоӣ, то 2 тонна асал гирифтан  мумкин аст. Агар ин миқдор асалро ба фурӯш барорӣ, маблағи ҳангуфт ба даст меорӣ. Аммо ин соҳа аз кас заҳмати зиёд талаб мекунад. Каме беэътиноӣ нисбат ба оилаи занбӯр боиси пароканда шудани ин оила мегардад.
Сардори Раёсати кишоварзии вилоят Назрӣ Назриев гуфт, ки дар ин намоиш мутахассисон ширкат доранд ва сифати ҳар як маҳсулоти хоҷагиҳои занбӯрпарваронро ташхис намуда, барои ширкат дар озмуни ҷумҳуриявии «Асал-2016» тавсия медиҳанд.
Ин озмун рӯзи 6 сентябри соли равон дар пойтахти кишвар- шаҳри Душанбе баргузор мегардад.