Имрӯз дар Душанбе «Ҷоми Президенти Ҷумҳурии Тоҷикистон» оид ба теннис ифтитоҳ мешавад

Душанбе, 23.08.2016./АМИТ «Ховар»/. Аз  23 то  27 августи соли  равон  дар шаҳри Душанбе  мусобиқаи байналмилалӣ оид ба теннис байни наврасон барои дарёфти Ҷоми Президенти Ҷумҳурии Тоҷикистон  доир  мегардад. Мусобиқаи мазкур дар «Корти тенниси тобистона»-и КВД «Роҳи оҳани Тоҷикистон» баргузор гардида, он ба рушди ин намуди варзиш дар ҷумҳурӣ ва тарғиби тарзи ҳаёти солим такони нав мебахшад.
Дар  мусобиқаи мазкур   барои  ғолибони ҷои аввал ба духтарон ва писарон 7000 сомонӣ, барои ҷои дуюм 5600 сомонӣ, барои ҷои сеюм 3500 сомонӣ,  барои ҷои якум, дуюм ва сеюм ҷуфти духтарон ва  писарон мутаносибан 3500, 2800 ва 1750 сомонӣ  мукофот пешбинӣ шудааст. Хотиррасон менамоем, ки дар асоси банди 1-и Қарори Ҳукумати Ҷумҳурии Тоҷикистон аз 21 июли соли 2006 ҳар сол аз 20 то 27 август дар шаҳри Душанбе барои дарёфти Ҷоми Президенти Ҷумҳурии Тоҷикистон мусобиқаи байналмилалӣ оид ба теннис байни наврасон гузаронида мешавад.
Ёдовар мешавем, ки  соли ҳафтум аст, ки дар замони соҳибистиқлолӣ дар шаҳри Душанбе бо дастгирии бевоситаи Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон, Ҷаноби Олӣ, муҳтарам  Эмомалӣ Раҳмон мусобиқаи байналмилалӣ оид ба теннис байни наврасон барои дарёфти «Ҷоми Президенти Ҷумҳурии Тоҷикистон» бо иштироки варзишгарон аз давлатҳои хориҷӣ баргузор мегардад.  Баргузории ин чорабинии муҳим ба  арафаи таҷлили 25-умин солгарди рӯзи Истиқлолияти давлатӣ рост омадааст, ки он инъикоскунандаи рамзи муттаҳидӣ, ягонагӣ ва дӯстӣ миёни мардумони  гуногун мебошад.
Хотиррасон   менамоем, ки  аввалин  маротиба    бо фармони  Президенти   Ҷумҳурии  Тоҷикистон аз 19-уми марти соли 2005, №1535  нахустин мусобиқаи  байналмилалӣ  оид  ба теннис байни  наврасон барои  дарёфти  «Ҷоми Президенти   Ҷумҳурии  Тоҷикистон» доир гардид.
Сипас  дар асоси  Қарори  Ҳукумати Ҷумҳурии  Тоҷикистон   аз 21 июли  соли  2006,№340  ҳамасола  дар шаҳри Душанбе  барои дарёфти «Ҷоми Президенти   Ҷумҳурии  Тоҷикистон» мусобиқаи  байналмилалӣ  оид ба теннис байни  наврасон  гузаронида мешавад.