Ин пагоҳӣ сокинон дар «Машқҳои пагоҳирӯзӣ» фаъол буданд

Душанбе, 06.08.2016. /АМИТ «Ховар»/. Бахшида ба 25-солагии Истиқлолияти давлатии Ҷумҳурии Тоҷикистон Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон дар ҳамкорӣ бо Федератсияи футболи Тоҷикистон шурӯъ аз имрӯз ҳар рӯзи шанбе соати 06:00 дар саросари мамлакат «Машқҳои пагоҳирӯзӣ» баргузор мекунад. Аз ин баъд рӯзи шанбе дар саросари мамлакат Рӯзи варзиш эълон шудааст.
Ин тадбир бо мақсади ҷалби аҳолӣ ба варзиш ва ба ин васила тарғиб намудани тарзи ҳаёти солим дар партави дастуру супоришҳои Асосгузори сулҳу Ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар қаламрави кишвар  роҳандозӣ гардид.
Тавре ки қаблан бо истинод ба Кумитаи ҷавонон, варзиш ва сайёҳӣ иттилоъ дода будем, машқҳои пагоҳирӯзӣ дар марказҳои шаҳру ноҳияҳои ҷумҳурӣ, аз ҷумла дар Варзишгоҳи марказӣ, Боғи ғалаба, саҳни Театри опера ва балет, Сирки давлатӣ ва назди Шар-шараи Боғи Наврӯзгоҳи пойтахт доир мегарданд.
Субҳи барвақт сокинони касбу кори гуногун, наврасон ва ҷавонон ба ин марказҳо омада, дар «Машқҳои пагоҳирӯзӣ» фаъолона ширкат варзиданд.
Мавриди ёдоварист, ки Пешвои миллат ба солимгардонии ҷомеа, оммавигардонии варзиш ва ҷалби ҳарчи бештари ҷавонон ба варзиш диққати ҷиддӣ зоҳир намуда, ба масъулин супориш медиҳад, ки тарғибу ташвиқи варзиш ва тарзи ҳаёти солимро васеъ ба роҳ монанд.