Иштироки ҳайати Тоҷикистон дар ҷаласаи Созмони Ҳамкории Шанхай

Душанбе, 27.08.2016 /АМИТ «Ховар»/. 23-25 августи соли ҷорӣ дар шаҳри Остонаи Ҷумҳурии Қазоқистон ҷаласаи Шӯрои ҳамоҳангсозони миллии давлатҳои аъзои Созмони ҳамкории Шанхай баргузор гардид, ки ҷаласаи якуми ин ниҳод дар давраи раисии Қазоқистон дар СҲШ дар солҳои 2016-2017 ба ҳисоб меравад.
Ҳайати Ҷумҳурии Тоҷикистон дар ин ҷаласа бо роҳбарии муовини Вазири корҳои хориҷӣ Маҳмадшариф Ҳақдод иштирок намуд.
Дар рафти ҷаласа масъалаҳои вобаста ба чорабиниҳои давраи раисии Қазоқистон дар СҲШ дар солҳои 2016-2017, омодагӣ ба ҷаласаи дарпешистодаи Шӯрои сарони ҳукуматҳо (сарвазирон)-и давлатҳои аъзои СҲШ, баргузории чорабиниҳои банақшагирифташуда дар сатҳи роҳбарон ва коршиносони вазорату идораҳои дахлдори давлатҳои аъзои СҲШ, баррасии натиҷаи баъзе аз чорабиниҳои баргузоршуда ва дигар масъалаҳои мубрами фаъолияти СҲШ мавриди муҳокима карор гирифтанд.