Мақомоти Белгия ду фаронсавиро, ки таҳдиди таркондани истгоҳи роҳи оҳанро доштанд, дастгир карданд

Душанбе, 05.08.2016. /АМИТ «Ховар»/. Дар Белгия ду марди фаронсавӣ баъд аз таҳдиди таркондани истгоҳи роҳи оҳан дастгир карда шуданд. Рӯзи чоршанбе яке аз гумонбарон дар бинои истгоҳи роҳи оҳани шаҳри Кортрейки Белгия «ин ҷо ҳама чиз метаркад» садо баланд карда, дуюмин «террорист, террорист» гӯён фарёд мезад. Ин нидоҳо боиси ҳангомаи атрофиён гардида, кӯчонидани фаврии одамон аз бинои истгоҳи роҳи оҳан сурат гирифт.
Дар ин бора Агентии иттилоотии ТАСС бо истинод ба шабакаи телевизионии RTL хабар медиҳад.
Бино ба иттилои манбаъ, шахсияти вайронкунандагони тартибот ба воситаи сабти камераҳои назоратӣ муайян карда шуд. Онҳо А. Рабахи 38-сола ва К. Нассери 43-сола аз шаҳри Рубеи шимоли Фаронса буданд.
Пас аз боздошт гумонбарон тамоми иттиҳомотро инкор карданд.