Мактаби навбунёд дар деҳоти Навобод дар тӯли 25 соли соҳибистиқлолӣ 14-умин муассисаи таълимӣ мебошад

Душанбе, 26.08.2016. /АМИТ «Ховар»/. «Муассисаи таълимии имрӯза барои 640 ҷойи нишаст бо сарфи беш аз 18 миллион сомонӣ бунёд гардида, туҳфаи идонаи Ҳукумати мамлакат ба устодону шогирдони ин даргоҳи илму маърифат дар остонаи ҷашни камолоти давлати соҳибистиқлоламон ва соли нави хониш мебошад»,-зикр намуд Асосгузори сулҳу Ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон зимни суханронӣ дар маросими ифтитоҳи мактаби навбунёд дар деҳоти Навободи ноҳияи Ҷалолиддини Балхӣ.
Сарвари давлат Эмомалӣ Раҳмон ҳамчунин таъкид намуд, ки мактаби навбунёд дар деҳоти Навобод дар тӯли 25 соли соҳибистиқлолӣ 14-умин муассисаи таълимие мебошад, ки бо тамоми шароити муосири таълиму тарбия таъмин гардида, фарзандони мардуми ноҳияи Ҷалолиддини Балхиро ба таҳсил фаро гирифтааст. Яъне, то имрӯз аз ҳисоби ҳамаи сарчашмаҳои маблағгузорӣ дар ноҳия барои 5500 ҷойи нишаст мактабҳои нав ва синфхонаҳои иловагӣ бунёд карда шудаанд.