Маркази бемориҳои сили ноҳияи Восеъ бо таҷҳизоти муосир таъмин гардидааст

Восеъ, 17.08.2016. /АМИТ «Ховар»/. Дар давоми 25 соли Истиқлолияти давлатӣ соҳаи тандурустӣ дар ноҳияи Восеъ рушд намуда, тамоми муассисаҳои табобатии ноҳия аз таъмир бароварда шуданд.  Се беморхонаи калонтарин, 8 марказу  бунгоҳи тиббӣ мавриди истифода қарор гирифта,  кори кормандони соҳаи тибро хеле  осон карданд.
Дар  10 соли охир  бо дилсӯзию мусоидати Асосгузори  сулҳу Ваҳдати миллӣ, Пешвои миллат, Президенти кишвар муҳтарам Эмомалӣ Раҳмон  чандин адад  дастгоҳҳои калонҳаҷми тиббӣ  ба ноҳия ворид карда шуданд. Ҳоло бо ҷалби  мутахассисони варзида  ҳама намуди ҷарроҳӣ  дар ноҳия гузаронида мешавад.
Ба иттилои директори Маркази бемориҳои сили  ноҳияи Восеъ Сафаралӣ Мирзоев,  имрӯзҳо дар Маркази ҳимояи аҳолӣ  аз бемории сил ҳама намуди ин беморӣ  бо истифода аз дастгоҳи  рентгении муосир  муайян  карда мешавад.
Шумораи гирифторони бемории сил дар ноҳия соли 2010  416 нафарро  ташкил медод  ва баъди гузаронидани  таҳлилу  мавриди табобат қарор додани  гирифторони бемории сил ин шумора дар соли 2016 ба 222 нафар  расид.