Машварат: «Такмили бренди сайёҳии Ҷумҳурии Тоҷикистон» ба кори худ шурӯъ кард

Душанбе, 02.08.2016. /АМИТ «Ховар»/.  Дирӯз дар шаҳри Душанбе машварати омӯзишӣ дар мавзӯи «Такмили бренди сайёҳии Ҷумҳурии Тоҷикистон» ба кори худ шурӯъ кард.
Ба иттилои корманди маркази матбуоти Кумитаи ҷавонон, варзиш ва сайёҳӣ Шералӣ Ҷалолов, дар ҳамоиш намояндагони бахши сайёҳии Кумитаи ҷавонон, варзиш ва сайёҳӣ ва зертобеи он, ассотсиатсияҳо, ширкатҳои сайёҳӣ, меҳмонхонаҳо, муассисаҳои олӣ ва миёнаи касбӣ, ки дар риштаи сайёҳӣ мутахассис омода менамоянд, иштирок доранд.
Аҳтам Абдуллозода, раиси Кумитаи ҷавонон, варзиш ва сайёҳӣ  зимни ифтитоҳи он иброз намуд: «Ҳукумати Ҷумҳурии Тоҷикистон баҳри рушди сайёҳӣ тамоми талоши худро ҷиҳати аз байн бурдани монеаҳо ва фароҳам овардани шароитҳои иқтисодӣ, иҷтимоӣ ва ҳуқуқӣ равона намуда истодааст. Узвияти Тоҷикистон ба Созмони умумиҷаҳонии туристӣ (СУТ) дар баробари омӯзиши таҷрибаи пешрафтаи ҷаҳонӣ ва иштирок дар ҷараёни ҳаллу фасли масоили рӯзмарраи соҳа, барои ташаккул ва дар оянда мустаҳкам кардани нуфузи ҷумҳурӣ ҳамчун кишвари сайёҳӣ мусоидат хоҳад кард».
Дар ҷараёни машварат Мусаллим Афандиев, ёрдамчии Котиби генералии СУТ оид ба кишварҳои Аврупо ва  Анита Каур, мушовири Котиби генералии СУТ оид ба омӯзиши таҷрибаи давлатҳои пешқадами соҳаи сайёҳӣ сухан ронданд.
Шералӣ Ҷалолов ҳамчунин иттилоъ дод, ки машварат  бо ташаббуси Кумитаи ҷавонон, варзиш ва сайёҳӣ дар ҳамкорӣ бо Созмони умумиҷаҳонии сайёҳӣ бо ҷалби мутахассисони сатҳи байналмилалӣ се рӯз идома ёфта, баргузории он зимни сафари Котиби генералии Созмони умумиҷаҳонии туристии СММ Толиб Рифоӣ ба Ҷумҳурии Тоҷикистон баррасӣ ва ба нақша гирифта шуда буд.