Муҳоҷирони меҳнатӣ ба Нефтеюганск сафарбар шуданд

Душанбе, 20.08.2016 /АМИТ «Ховар»/. Субъекти хоҷагидори ҶДММ «Сомонэкспрестранс» дар ҳамкорӣ бо Раёсати Хадамоти муҳоҷирати Вазорати меҳнат, муҳоҷират ва шуғли аҳолии Ҷумҳурии Тоҷикистон дар вилояти Суғд гурӯҳи навбатии муҳоҷирони меҳнатиро ба Федератсияи Русия сафарбар намуд.
Бино ба иттилои сардори гурӯҳ Алихон Ниёзов, 20 нафар муҳоҷирони меҳнатии сафарбаршуда асосан сокинони шаҳрҳои Бӯстон, Истиқлол, Панҷакент, Гулистон ва ноҳияи Бобоҷон Ғафуров мебошанд. Муҳлати муҳоҷирати меҳнатии онҳо 1 сол пешбинӣ шудааст.
Шаҳри қабулкунандаи муҳоҷирон Нефтеюганск мебошад. Тибқи нақша онҳо асосан ба корҳои сохтмонӣ машғул хоҳанд шуд.
Инчунин  субъекти хоҷагидори ҶДММ «Роҳи Абрешим» аз аввали моҳи август наздик ба 200 нафар муҳоҷирро ба Федератсияи Русия сафарбар намуд.
Зимни бурдани корҳои фаҳмондадиҳии намояндагони раёсат маълум гардид, ки муҳоҷирон  асосан шаҳрҳои Новосибирск ва Тюменро барои истиқомат ва фаъолияти меҳнатии мавсимӣ интихоб намудаанд.
Ҳангоми гусел кормандони Раёсат ба муҳоҷирони меҳнатӣ маводи ташвиқотию тарғиботӣ тақсим намуданд.
Дар маҷмӯъ, аз ҷониби субъекти хоҷагидори мазкур 4 гурӯҳи муҳоҷирони меҳнатӣ сафарбар гардиданд.