Муносибатҳои меҳнатӣ байни Тоҷикистон ва Беларус тақвият меёбанд

Душанбе, 05.08.2016. /АМИТ «Ховар»/.  Масъалаҳои муносибатҳои меҳнатӣ, муҳоҷират, шуғли аҳолӣ дар вохӯрии  вазири меҳнат, муҳоҷират ва шуғли аҳолии Ҷумҳурии Тоҷикистон Сумангул Тағойзода бо Сафири фавқулода ва мухтори Ҷумҳурии Беларус дар Ҷумҳурии Тоҷикистон Олег Иванов муҳокима гардиданд.
Дар ин бора ба хабарнигори АМИТ «Ховар» аз Вазорати меҳнат, муҳоҷират ва шуғли аҳолии Ҷумҳурии Тоҷикистон иттилоъ доданд.
Тарафҳо дар вохӯрӣ масъалаҳои марбут ба самтҳои фаъолияти вазорат,   таҳсилоти ибтидоии касбӣ ва таълими калонсолонро мавриди баррасӣ  қарор додаанд.
Ба иттилои манбаъ, ҷонибҳо инчунин масъалаҳои ҳамкории дуҷонибаро дар самти таҳия ва омода намудани санадҳои меъёрии ҳуқуқии соҳавӣ муҳокима карда, барои ҳамкории минбаъда дар ин самт ибрози ақида намуданд.