Мусобиқаи волейбол миёни бонувон бахшида ба 25-солагии Истиқлолият оғоз гардид

Душанбе, 04.08.2016. /АМИТ «Ховар»/. Ба муносибати 25 — солагии Истиқлолияти давлатии Ҷумҳурии Тоҷикистон дирӯз дар Маҷмааи варзишии ШҶ «Динамо»-и Вазорати корҳои дохилии Ҷумҳурии Тоҷикистон таҳти шиори «Варзиш-солимии ҷомеа» Мусобиқаи кушоди даставӣ байни бонувон оид ба волейбол оғоз гардид.
Тавре аз Вазорати корҳои дохилии кишвар хабар доданд, мусобиқа ба баланд бардоштани ҳисси ватандӯстӣ, таҳкими дӯстию рафоқат ва ташвиқу тарғиби тарзи ҳаёти солим дар ҷомеа равона карда шудааст.
Муовини вазири корҳои дохилӣ, генерал-майори милитсия  Икром Умарзода   зикр кард: «Имрӯзҳо дар саросари ҷумҳурӣ бахшида ба ҷашни Истиқлолияти давлатии Ҷумҳурии Тоҷикистон чорабиниҳои гуногуни варзишӣ ва фарҳангӣ баргузор шуда истодааст, ки он як туҳфаи арзанда барои сазовор таҷлил намудани ин рӯйдоди таърихӣ мебошад. Мусобиқаи имрӯза агар аз як тараф ғолибон ва беҳтаринҳоро муайян кунад, аз ҷониби дигар ҳамкорӣ ва муносибатҳои кормандони мақомоти қудратӣ ва ҳифзи ҳуқуқ, ташкилоту идора ва корхонаҳои давлатиро қавитар месозад».
Дар  мусобиқа 10 даста дар ду гурӯҳ «А» ва «Б» аз Сарраёсати қӯшунҳои сарҳадӣ, Мақомоти иҷроияи ҳокимияти давлатии ноҳияи Шоҳмансур, Вазорати мудофиаи Ҷумҳурии Тоҷикистон, Агентии назорати маводи нашъадори назди Президенти Ҷумҳурии Тоҷикистон, Вазорати маориф ва илми ҶТ, Донишкадаи давлатии санъати Тоҷикистон ба номи М.Турсунзода, Коллеҷи ба номи М.Атоев, Хадамоти давлатии «Муҳофиза», Академия ва Вазорати корҳои дохилӣ байни ҳам рақобат намуда, барои ба даст овардани ғолибият маҳорати варзишии худро месанҷанд.