Рио-2016: ИМА бо 15 медали тилло, 12 медали нуқра ва 10 медали биринҷӣ дар ҷои аввал қарор дорад

Душанбе, 12.08.2016. /АМИТ «Ховар»/. Дар садри феҳристи ҷоизадорҳои Бозиҳои XXXI тобистонаи олимпӣ дар шаҳри Рио-де-Жанейрои Бразилия  мунтахаби ИМА бо 15 медали тилло, 12 медали нуқра ва 10 медали биринҷӣ дар ҷои аввал қарор дорад. Чин бо 11 медали тилло, 8 медали нуқра ва 11 медали биринҷӣ дар ҷои дуюм ва Ҷопон бо 7 медали тилло, 2 нуқра ва 13 биринҷӣ дар ҷои сеюм мебошанд.
Дар ин бора  ба АМИТ «Ховар» аз Кумитаи  миллии олимпии  Тоҷикистон  хабар доданд.
Ба иттилои манбаъ, ба даҳгонаи беҳтарин, инчунин Австралия (5-4-6), Кореяи Ҷанубӣ (5-2-4), Венгрия (5-1-1), Русия (4-8-7), Британияи Кабир (4-6-6), Олмон (4-3-1) ва Италия (3-6-3) дохил гардидаанд. Дар маҷмӯъ то имрӯз варзишгарони 57 кишвар медалҳои олимпии Рио-2016-ро ба даст овардаанд.
Варзишгарони 35 кишвар барандагони медалҳои тиллои Бозиҳои XXXI тобистонаи олимпӣ шудаанд. Аз миёни кишварҳои собиқ Шӯравӣ ба ҷуз Русия, боз ҳашт кишвар — Қазоқистон (2 медали тилло, 2 нуқра ва 3 биринҷӣ,  ҷои 12-ум), Украина (2 медали нуқра ва як биринҷӣ,  ҷои 38-ум), Озарбойҷон (2  медали нуқра,  ҷои 39-ум), Гурҷистон (1 медали нуқра ва 1 биринҷӣ,  ҷои 43-юм), Литва (1 медали нуқра ва 1 биринҷӣ,  ҷои 43-юм), Ӯзбекистон (2 медали биринҷӣ,  ҷои 49-ум), Қирғизистон (1 медали биринҷӣ,  ҷои 51-ум) ва Эстония (1 медали биринҷӣ,  ҷои 51-ум) ба гирифтани медалҳои олимпии Рио мушарраф гаштаанд.
Ёдовар  мешавем, ки  Бозиҳои XXXI тобистонаи олимпӣ дар шаҳри Рио-де-Жанейрои Бразилия то 21 август идома меёбанд.