Роҳҳои ҳалли масъалаҳои сайёҳии вилояти Суғд баррасӣ мешаванд

Душанбе, 13.08.2016. /АМИТ «Ховар»/.  16 август дар шаҳри Хуҷанд конфронси миллии сайёҳӣ дар мавзӯи «Тоҷикистон ҷавҳари кашфношуда: мушкилот ва дурнамо» баргузор мегардад.
Конфронс аз ҷониби Кумитаи ҷавонон, варзиш ва сайёҳии назди Ҳукумати  ҶТ бо мақсади мусоидат намудан ба устувории рушди туризм ва ҷалби таваҷҷуҳи доираи намояндагони бахши хусусӣ, аз ҷумла ширкатҳои сайёҳӣ барои фаъол гардонидани хатсайрҳои туристӣ ва баланд бардоштани сифати хизматрасонии соҳаи сайёҳӣ гузаронида мешавад.
Масъулини Кумитаи ҷавонон, варзиш ва сайёҳӣ дар ҷараёни конфронс роҳҳои ҳалли масъалаҳои сайёҳии вилояти Суғдро якҷоя бо мақомоти маҳаллӣ баррасӣ менамоянд.
Дар заминаи конфронс бегоҳии ҳамон рӯз дар Боғи ба номи Камоли Хуҷандии Маҷмааи фарҳангию таърихии «Қалъаи Хуҷанд» намоиши ҳунарҳои мардумии шаҳру ноҳияҳои вилоят баргузор мешавад.
Дар ин бора аз Кумитаи ҷавонон, варзиш ва сайёҳии назди Ҳукумати  ҶТ хабар доданд.