Шахсоне, ки дар кофтукови ҷиноӣ қарор доранд, авф мегарданд, агар…

  Душанбе, 24.08.2016/АМИТ «Ховар»/. «Қонуни авф нисбат ба ҷинояткороне, ки дар кофтукови ҷиноӣ берун аз ҳудуди кишвар қарор доранд, ба истиснои  он нафароне, ки ҷиноятҳои махсусан вазнин содир кардаанд, татбиқ карда мешавад»,-гуфт Прокурори  генералии Ҷумҳурии Тоҷикистон Юсуф Раҳмон зимни баррасии лоиҳаи Қонуни  Ҷумҳурии Тоҷикистон «Дар бораи авф», ки ин соатҳо дар Парлумони кишвар мавриди баррасӣ қарор дорад.
Инчунин Шермуҳаммад Шоҳиён, раиси Суди Олии Ҷумҳурии Тоҷикистон гуфт, ки ҳамзамон маҳкумшудагоне, ки аз ҷониби судҳои кишварҳои хориҷӣ ба ҷавобгарии  ҷиноятӣ кашида, маҳкум карда шудаанд ва барои адои  минбаъдаи ҷазо ба Ҷумҳурии Тоҷикистон оварда шудаанд, татбиқ мегардад.
Бояд тазаккур дод, ки лоиҳаи Қонуни Ҷумҳурии Тоҷикистон «Дар бораи авф» бахшида ба ҷашни 25-солагии  Истиқлолияти давлатии Ҷумҳурии Тоҷикистон 17 августи соли равон аз ҷониби  Президенти Ҷумҳурии Тоҷикистон Эмомалӣ Раҳмон барои баррасӣ ва қабул ба Парлумони кишвар пешниҳод гардида буд.