Ҳаким Фузайлов: «Мо ба ғалаба наздик будем»

Душанбе, 7.09.2016 / АМИТ «Ховар» /. Сармураббии дастаи мунтахаби Тоҷикистон Ҳаким Фузайлов, ки аз рӯзи интихоб шуданаш то ба имрӯз бо тими мунтахаби мамлакат 4 вохӯрӣ гузаронида, дар ягонтоаш мағлуб нашудааст(бо Бангладеш дар ду бозӣ 1:0, 5:0, Сурия 0:0, Фаластин 1:1), дар нишасти матбуотии баъдибозӣ дар варзишгоҳи «Дуръа» гуфт: «Сифати бозии бачаҳо маро қонеъ кард. Мо нисбат ба соҳибони майдон бартарӣ доштем. Бачаҳо низоми бозиро хуб риоя мекунанд ва он ҷое, ки тартибот ҳукмрон аст, натиҷа ҳосил мешавад. Дар ин вохӯрӣ мо ҳамаи бозингаронро аз назар гузаронидем. Фикр мекунам, ки даста бо роҳи дуруст равон аст».
Аз нуқтаи назари сармураббии дастаи мунтахаби кишварамон ҳунарнамоии Парвизҷон Умарбоев аз дигар легионерҳое, ки дар ҳайати даста бозӣ карданд, фарқкунанда аст, зеро Нуриддин Давронов ва Ҷаҳонгир Эргашев алҳол дар ҳайати дастаҳои худ ягон бозӣ накардаанд ва ин эҳсос мегардад.
Сабаби асосии ба бозиҳо набаромадани Нуриддин Давронов ва Ҷаҳонгир Эргашев дар ҳайати дастаҳояшон, пеш аз ҳама, ҳуҷҷатнигорӣ барои Нуриддин ва осебгирии Ҷаҳонгир мебошад.
Умед ҳаст, ки дар бозиҳои минбаъда ин бозингарон ҳарчи бештар ба майдони бозӣ меоянд ва малакаю маҳорати худро сайқал медиҳанд.