Ғалабаи дастаи «Ҳосилот» бар «Хуҷанд» дар меҳмонӣ

Душанбе, 22.09.2016. /АМИТ«Ховар»/. Шоми дирӯз дастаи футболи «Ҳосилот»-и Фархор дар бозии мавқуфгузоштаи даври дувоздаҳуми мусобиқоти қаҳрамонии футболи Тоҷикистон байни дастаҳои лигаи олӣ дар меҳмонӣ дастаи «Хуҷанд»-и шаҳри Хуҷандро бо ҳисоби 1:0 шикаст дод. Ин бозӣ дар варзишгоҳи «20-солагии Истиқлолияти Тоҷикистон»-и шаҳри Хуҷанд бо ҳузури 1200 нафар тамошобин баргузор шуд.
Голи ягонаро дар бозӣ Хайрулло Азизов дар нимаи аввали дидор, дар дақиқаи 31-ум ба ҳадаф расонд. Ҳамакнун дастаи «Ҳосилот» бо 25 имтиёз дар ҷадвали мусобиқот боз ба ҷойи дувум баромад.
Хотирррасон менамоем, ки футболбозони ноҳияи Фархор нисбат ба дастаи «Истиқлол»-и Душанбе, ки бо 33 имтиёз дар ҷойи аввал аст, ҳашт имтиёз камтар гирифтаанд.
Дастаи футболи «Ҳосилот» нисбат ба дастаҳои «Регар-ТадАЗ»-и Турсунзода ва ССКА «Помир»-и Душанбе, ки бо 20-имтиёзӣ мутаносибан дар ҷойҳои сеюму чорум қарор доранд, панҷ имтиёз бештар ба даст овардааст.
Ёдовар мешавем, ки бозиҳои даври 15-уми мусобиқоти лигаи олӣ 24-25 сентябр баргузор мешаванд. Рӯзи шанбе се бозӣ байни дастаҳои — «Ҳосилот», ССКА «Помир», «Барқчӣ» «Вахш», «Хуҷанд» «Регар-ТадАЗ» ва рӯзи якшанбе ду бозӣ миёни дастаҳои «Равшан»- «Истиқлол» ва «Хайр»- «Парвоз» барпо мегарданд.