Ҷамъбасти ҳамоиши «Нури маърифат» дар вилояти Суғд

Душанбе, 02.09.2016. /АМИТ «Ховар» /. Бобати дастгирии оилаҳои ниёзманд ва камбизоат, махсусан кӯдакони маъюб ва дорои маълулият аз 1 август то 1 сентябри соли 2016 дар шаҳру ноҳияҳои вилояти Суғд иқдоми «Нури маърифат» гузаронида шуд.
Тавре аз Кумитаи иҷроияи Ҳизби халқии демократии Тоҷикистон дар вилояти Суғд хабар доданд, дар доираи чорабиниҳои ҳамоиши мазкур аз ҷониби Кумитаҳои иҷроияи ҲХДТ дар вилоят, шаҳру ноҳияҳо, ташкилотҳои ибтидоӣ бо ҷалби вакилони халк ва аъзою ҷонибдорони ҲХДТ хонандагон аз оилаҳои камбизоат, ятимон, бепарасторон ва махсусан кӯдакони маъюб ва дорои маълулият бо либоси мактабӣ ва лавозимоти хониш таъмин карда шуданд. Ҳамоиши хайриявӣ дар Кумитаҳои иҷроия ва ташкилотҳои ибтидоии Ҳизби халқии демократии Тоҷикистон дар ҳамаи шаҳру ноҳияҳои вилояти Суғд то 1 сентябр идома ёфта, дар маҷмӯъ дар қаламрави вилоят зимни баргузории ҳамоиш 6 ҳазору 523 нафар хонандагон фаро гирифта шуданд.
Волидон ва кӯдакони онҳо барои ғамхорӣ ва меҳрубонии Асосгузори сулҳу Ваҳдати миллӣ — Пешвои миллат, Президенти кишвар муҳтарам Эмомалӣ Раҳмон, ки бо вазифагузории он кас ин иқдомҳо амалӣ гардида истодаанд, миннатдории бепоёни худро изҳор намуданд.