Баррасии масъалаҳои сиёсат, таъмини амният ва мустаҳкамӣ дар ҳудуди Иттиҳод дар ҷаласаи Шӯрои сарони давлатҳои ИДМ дар Қирғизистон

Душанбе, 23.09.2016 /АМИТ «Ховар»/. Ҷаласаи навбатии Шӯрои сарони давлатҳои Иттиҳоди Давлатҳои Мустақил дар Ҷумҳурии Қирғизистон баргузор гардид. Дар кори ҷаласаи Шӯрои сарони давлатҳои Иттиҳоди Давлатҳои Мустақил директори Агентии омори назди Президенти Ҷумҳурии Тоҷикистон Ҳасанзода Гулнора Кенҷа иштирок намуд.
Тавре ки аз Агентии омор хабар доданд, рӯзномаи ҷаласаи Шӯрои сарони давлатҳои Иттиҳоди Давлатҳои Мустақил масъалаҳои сиёсат, таъмини амният ва мустаҳкамӣ дар ҳудуди Иттиҳод, ҳамкории гуманитарӣ, инчунин баргузории давраи навбатии барӯйхатгирии аҳолӣ дар соли 2020 дар давлатҳои аъзои Иттиҳоди Давлатҳои Мустақилро дар бар гирифт.
Баргузории барӯйхатгирии аҳолиро дар соли 2020 Шӯрои сарони давлатҳои ИДМ ҷонибдорӣ намуд.
Мутобиқи Қонуни Ҷумҳурии Тоҷикистон «Дар бораи барӯйхатгирии аҳолӣ» аз 19 майи соли 2009 ва Фармони Президенти Ҷумҳурии Тоҷикистон «Дар бораи тайёрӣ ва гузаронидани барӯйхатгирии аҳолӣ ва фонди манзили Ҷумҳурии Тоҷикистон дар соли 2020» аз 12 октябри соли 2015 барӯйхатгирии навбатии аҳолӣ ва фонди манзил дар Ҷумҳурии Тоҷикистон соли 2020 гузаронида мешавад.
Натиҷаҳои барӯйхатгирии аҳолӣ барои ташаккули низоми ягонаи хазинаи иттилооти оморӣ, дар ҷабҳаи тавсифоти аҳолӣ замина мегузоранд. Он барои гузаронидани интихоб дар таҳқиқоти муҳими захираҳои меҳнатӣ, шароити зиндагӣ, инчунин ҳангоми аниқ кардани маълумоти омори ҷорӣ ва ҳисобҳои гуногуни демографӣ истифода мешавад.
Натиҷаҳои барӯйхатгирӣ ҳамчун маводи асосии заминавӣ барои таҳияи стратегияи ояндадори рушди устувори иҷтимоӣ- иқтисодӣ, инчунин нақшаҳои миёнамуҳлат ба ҳисоб мераванд.