Баррасии татбиқи тарҳҳои муштарак дар соҳаҳои энергетика ва истихроҷи канданиҳои фоиданок дар мулоқоти Ҳ. Зарифӣ ва К. Фуруя

Душанбе, 22.09.2016. /АМИТ «Ховар»/. 20 сентябри соли 2016 Сафири Фавқулода ва Мухтори Ҷумҳурии Тоҷикистон дар Япония Ҳамрохон Зарифӣ бо вакили Палатаи намояндагони Парлумони Япония, муовини раиси Гурӯҳи дӯстии байнипарлумонӣ миёни Тоҷикистон ва Япония Кэйҷи Фуруя мулоқот анҷом намуд.
Зимни мулоқот ҷонибҳо масъалаҳои густариши ҳамкории дуҷонибаи тиҷоративу иқтисодӣ, энергетикӣ, сармоягузорӣ, инчунин татбиқи тарҳҳои муштарак дар соҳаҳои энергетика ва истихроҷи канданиҳои фоиданокро баррасӣ намуданд. Тарафҳо иброз доштанд, ки имкониятҳои фаровони мутақобилаи истифоданашуда миёни ду кишвар метавонанд ҷиҳати робитаҳо дар соҳаҳои мазкур босамар истифода шаванд.
Миёни маҷмӯи масоили баррасишуда, ҳамчунин зарурати фаъолгардонии ҳамкорӣ дар доираи Гурӯҳи дӯстии байнипарлумонӣ ва таҳкими робитаҳо миёни сохторҳои соҳавии ду кишвар таъкид гардиданд.
Ҷонибҳо инчунин зарурати ҳамкории босамари Тоҷикистон ва Японияро дар арсаи байналмилалӣ бо назардошти мавқеи яксони ду кишвар доир ба масълаҳои обу энергетикӣ, пешгирӣ аз хавфҳо ва офатҳои табиӣ, амният ва субот дар чаҳорчӯби Созмони Милали Муттаҳид ва дигар созмонҳои байналмилалӣ иброз доштанд.