Дар Деваштич аз дастовардҳои истиқлолият ёдоварӣ намуданд

Душанбе, 13.09.2016. /АМИТ «Ховар»/. Фаъолони ноҳияи Деваштич дар маҷлиси тантанавӣ дастовардҳои даврони истиқлолиятро дар тӯли 25 сол арзёбӣ карданд. Зикр шуд, ки тӯли ин муддат дар тамоми деҳаҳои ноҳия мактабу табобатгоҳ, иншооти варзишӣ, роҳу пулҳо мавриди истифода қарор гирифтанд. Дар рӯзҳои таҷлили 25-солагии Истиқлолияти давлатӣ дар деҳаи Угук ва Қалъаи Ҳоҷӣ биноҳои нави мактаб ва дар деҳаи Истиқлол беморхонаи нав мавриди истифода қарор гирифтанд. Қасри фарҳанг аз нав бо тарҳи замонавӣ таъмир гашта, ба худ ҳусни тоза гирифт. Баробари корҳои ободонию бунёдкорӣ тафаккуру ташаккули зеҳнии мардум, хосса ҷавонон тағйир ёфт, ҷавонон маънии Истиқлолиятро дарк карданд ва имрўз натиҷаи ин аст, ки даҳҳо нафар ҷавонони ноҳия дар давлатҳои Чину Олмон, Малайзияю Русия, Беларусу Қазоқистон таҳсил доранд.