Дар Душанбе мусобиқаи гӯштини миллӣ доир гардид

Душанбе, 19.09.2016. /АМИТ Ховар/. 17 сентябри соли равон ба муносибати 25- солагии Истиқлолияти давлатии Ҷумҳурии Тоҷикистон дар Варзишгоҳи марказии ҷумҳуриявӣ Фестивали бозиҳои миллии варзишӣ ва Мусобиқаи ҷумҳуриявӣ оид ба гӯштингирӣ баргузор гардид. Дар он роҳбарияи Кумитаи ҷавонон, варзиш ва сайёҳӣ, Федератсияи футбол, Федератсияи гӯштини миллӣ, намояндагони корпусҳои дипломатии муқими Душанбе, намояндагони ВАО ва дигар мухлисону ҳаводорони варзиш иштирок намуданд.
Дар мусобиқаи варзишӣ паҳлавонони вилояти Суғд, вилояти Хатлон, ВМКБ ва шаҳри Душанбе ширкат намуда, аз рӯи вазнҳои 65-80+90 байни ҳам рақобат карданд.
Дар ин мусобиқаи варзишӣ шоҳҷоиза- се мошини сабукрав барои паҳлавонон гузошта шуда буд.
Бояд зикр кард, ки паҳлавонон дар вазни 65 кило Хоҷазода Беҳрӯз, дар вазни 80 кило Соҳиб Ҳакимов ва дар вазни +90 кило- иштирокчии Бозиҳои олимпии Рио-2016 Комроншоҳи Устопириён бар ҳамаи рақибонашон ғолиб омада, сазовори медалҳои тилло ва шоҳҷоиза гардиданд.