Дар ноҳияи Рашт ба забономӯзии хонандагон диққати ҷиддӣ зоҳир мешавад

Рашт, 22.09.2016. /АМИТ «Ховар»/. Бо мақсади таҳкими таълими забонҳои русӣ ва англисӣ бо Қарори Ҳукумати Ҷумҳурии Тоҷикистон барномаи нави такмил ва омӯзиши ин забонҳо барои солҳои 2015-2020 қабул гардид. Дар партави иҷрои ин Қарори Ҳукумати Ҷумҳурии Тоҷикистон Мақомоти иҷроияи ҳокимияти давлатии ноҳияи Рашт тадбирҳои зарурӣ меандешад, то муассисаҳои таълимии ноҳия бо мутахассисони зобондон таъмин карда шаванд.
Тибқи иттилои мудири шуъбаи маорифи ноҳия Холмаҳмад Ортиқов, дар муассисаҳои таълимии ноҳия айни ҳол 85 нафар омӯзгор, аз ҷумла 20 нафар зан аз фанни забони русӣ ва 73 нафар омӯзгор, аз ҷумла, 16 нафар зан аз фанни забони англисӣ ба таълиму тарбияи хонандагон машғул мебошанд.
Зинаи аввалини таҳсилот зинаи таҳсилоти томактабӣ ба ҳисоб меравад ва маҳз ин зина дар омода намудани кӯдак ба таълим ва ташаккули равонию ҷисмонии он мусоидат менамояд. Холмаҳмад Ортиқов иброз дошт, ки айни замон дар ноҳия 2 муассисаи томактабӣ фаъолият дошта, 160 нафар кӯдак ба таълиму тарбия фаро гирифта шудаанд.
Соли таҳсили сипаришуда дар ноҳия 39 Маркази инкишофи кӯдакон бо фарогирии 742 нафар кӯдакони синни томактабӣ фаъолият дошт, ки дар онҳо 40 нафар омӯзгорон ба таълиму тарбияи кӯдакон машғул буданд.