Дар оянда дар Рашт ду неругоҳи барқи обии хурд сохта мешавад

Душанбе, 28.09.2016/АМИТ «Ховар»/. «Дар даврони истиқлолият дар минтақаи Рашт бо ҷалби сармояи хориҷӣ ва ҳиссагузории Ҳукумати мамлакат 7 лоиҳаи давлатии сармоягузорӣ ба маблағи 1,4 миллиард сомонӣ татбиқ гардида, 852 километр роҳ ва 25 пул ба истифода дода шудааст». Ин матлабро Президенти Ҷумҳурии Тоҷикистон Эмомалӣ Раҳмон зимни мулоқот бо сокинони ноҳияи Рашт шоми 27 сентябр иброз доштанд.
Пешвои миллат таъкид карданд, ки ҳоло бо дастгирии шарикони рушд корҳои омода намудани асосноккунии техникиву иқтисодии лоиҳаҳои афзалиятноки соҳаи энергетика, аз ҷумла барқарорсозии шабакаҳои барқии баландшиддат дар минтақаи Рашт идома доранд. Тибқи лоиҳаи мазкур сохтмони 620 километр хатҳои интиқоли барқ ва 2 зеристгоҳи барқӣ пешбинӣ гардидааст. Ҳамзамон дар асоси «Барномаи аз худ намудани манбаъҳои барқароршавандаи энергия ва сохтмони неругоҳҳои барқи обии хурд барои солҳои 2016-2020» дар ноҳия бунёди боз ду неругоҳи хурди барқи обӣ ба нақша гирифта шудааст.
Сарвари кишвар зикр намуданд, ки дар ин ҷода сохтору мақомоти дахлдорро зарур аст ҷиҳати сари вақт амалӣ кардани лоиҳаҳо ва омодагии иншооту шабакаҳои таъминоти барқ ба мавсими тирамоҳу зимистон чораҷӯӣ намоянд.
Бояд тазаккур дод, ки Президенти Ҷумҳурии Тоҷикистон Эмомалӣ Раҳмон зимни сафари корӣ ба шарқи кишвар, ки аз 18 сентябр оғоз гардид, аз ноҳияҳои Сангвор, Нуробод, Тоҷикобод, Лахш, Рашт ва Дарвоз боздид карда, дар маросими ба истифода додани чандин иншооти муҳими дорои аҳамияти иқтисодию иҷтимоӣ ширкат намуда, бо сокинони навоҳии водии Рашт мулоқоти самимӣ карданд.