Дар шаҳри Боку Рӯзи Истиқлолияти Тоҷикистонро бошукӯҳ таҷлил карданд

Душанбе, 13.09.2016. /АМИТ «Ховар»/. 9 сентябри соли равон дар шаҳри Боку ба муносибати 25-умин солгарди Рӯзи Истиқлолияти давлати Ҷумҳурии Тоҷикистон аз ҷониби Сафорати Ҷумҳурии Тоҷикистон дар Ҷумҳурии Озарбойҷон зиёфати расмӣ барпо гардид.
Дар маросими мазкур вазири меҳнат ва ҳифзи иҷтимоии аҳолии Ҷумҳурии Озарбойҷон Салим Муслимов ба сифати меҳмони фахрӣ иштирок намуд. Дар ҳамоиши мазкур инчунин гурӯҳи дӯстии байнипарлумонӣ, сафирон ва дипломатҳои хориҷии муқими шаҳри Боку, намояндагони вазорату идораҳои гуногуни кишвар ва расонаҳо, аҳли илму фарҳанги кишвари иқомат ва шаҳрвандону донишҷӯёни тоҷик ҳузур доштанд.
Дар суханони шодбошии худ сафири Тоҷикистон дар Озарбойҷон Зохир Саидов аз аҳамияти сарнавиштсози Истиқлол дар ташаккул ёфтани давлатдории навини тоҷикон бо роҳи бунёди давлати демократӣ, ҳуқуқбунёд ва дунявӣ ва ба такомули он дар роҳи сулҳ ва пешрафту шукуфоӣ таъкид намуд. Ӯ иброз дошт, ки эҳёи истиқлилоят пас аз ҳазор сол ба мардуми тоҷик шароит фарҳам овард, ки пуштибонӣ аз таърих, забон, фарҳанг ва анъанаҳои миллии худ намояд.
Вазири меҳнат ва ҳифзи иҷтимоии Ҷумҳурии Озарбойҷон Салим Муслумов аз номи Ҳукумати Ҷумҳурии Озарбойҷон мардуми Тоҷикистонро ба муносибати Рӯзи миллии истиқлолият табрику таҳният гуфта, аз ҳолати кунунии муносибатҳои дуҷониба ва бисёрҷонибаи миёни Тоҷикистону Озарбойҷон ёдовар шуда, инчунин аз нақшаҳои ояндаи ҳамкории сиёсӣ, иқтисодӣ, фарҳангӣ ва гуманитарӣ сухан гуфт.
Ба диққати ҳозирин намоишгоҳи аксҳо аз дастовардҳои Ҷумҳурии Тоҷикистон дар даврони истиқлолият, дар соҳаҳои гуногун аз ҷумла: сиёсат, иқтисод, фарҳанг, варзиш ва маориф, инчунин маводи таблиғотӣ бо акси табиати беназир ва иқтидори сайёҳии бойи Тоҷикистон пешниҳод гардид.
Ҷамъомади мазкур бо намоиши рақсҳои миллӣ ва сабти видеоӣ оид ба Тоҷикистон  анҷом пазируфт.