Дар ҷумҳурӣ ба маблағи беш аз 1 миллион сомонӣ масолеҳи сохтмонӣ истеҳсол шуд

Душанбе, 22.09.2016 /АМИТ «Ховар»/. Дар 8 моҳи соли 2016 ба маблағи 1,1 миллион сомонӣ масолеҳи сохтмонӣ истеҳсол шудааст, ки назар ба ҳамин давраи соли гузашта 294,6 миллион сомонӣ зиёд буда, суръати афзоиш 135,1 %-ро ташкил медиҳад.
Тавре ки аз Вазорати саноат ва технологияҳои нави Ҷумҳурии Тоҷикистон ба АМИТ «Ховар» хабар доданд, ҳаҷми истеҳсоли семент 1273,5 ҳазор тонна, масолеҳи деворӣ 156,4 миллион донаро ташкил дода, қуму шағал ба 822,0 ҳазор метри мукааб расидааст. Дар ин давра 120,9 ҳазор тонна семент, 33,6 ҳазор тонна қуми квартсӣ ва 181,7 тонна масолеҳи рангубор ба маблағи умумии 66,5 миллион сомонӣ ба хориҷи кишвар, аз ҷумла ба ҷумҳуриҳои Афғонистон, Қирғизистон, Қазоқистон ва Ӯзбекистон содир гардид.
Ёдовар мешавем, ки бо иштироки Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон корхонаҳои бузурги истеҳсоли сементи ҶДММ «Хуаксин Ғаюр Суғд семент»-и ноҳияи Бобоҷон Ғафуров, истеҳсоли варақаҳои гаҷӣ ҶДММ «Ху Чан Ғаюр Индустрал»-и ноҳияи Ёвон ва ҶДММ «Ширкати байналмилалии истеҳсолии Чжунгтсай Моҳир семент»-и ноҳияи Ёвон мавриди баҳрабардорӣ қарор гирифтанд.
Соли 2016 ҳаҷми истеҳсоли маҳсулот дар соҳаи масолеҳи сохтмонӣ 1,4 миллиард сомонӣ, истеҳсоли семент 1,6 миллион тонна, масолеҳи деворӣ 210,0 миллион дона ва қуму шағал 1,1 миллион метри мукааб пешбинӣ шудааст.