Молҳои содиротии музофоти Гансуи Чин дар Тоҷикистон муаррифӣ шуданд

Душанбе, 15.09.2016 /АМИТ «Ховар»/. Имрӯз дар Маҷмааи давлатии «Кохи Борбад» бо ташаббуси Палатаи савдо ва саноати Ҷумҳурии Тоҷикистон дар ҳамкорӣ бо Департаменти тиҷоратии ҳукумати халқии музофоти Гансуи Ҷумҳурии Мардумии Чин бахшида ба 25-солагии Истиқлолияти давлатии Ҷумҳурии Тоҷикистон якумин намоишгоҳи байналмилалии молҳои содиротии музофоти Гансу баргузор гардид.
Мақсади намоиши молҳои содиротии музофоти Гансу васеъ намудани муносибатҳои корӣ байни соҳибкорон, ҷалби сармояи Чин, технологияи муосир ва таҷҳизот буда, ин барои пешбурди вохӯриҳои тиҷоратӣ, бастани шартномаҳои манфиатнок ҷиҳати ҳамкорӣ, таъсис додани корхонаҳои муштарак, ҷойҳои нави корӣ ва баланд бардоштани сатҳи зиндагии аҳолии кишвар имконият фароҳам меорад.
Тавре муовини раиси Палатаи савдо ва саноати кишвар Манзура Рустамова иброз дошт, дар намоишгоҳи мазкур 40 ширкати саноатӣ, кишоварзӣ, илмӣ- истеҳсолӣ, тиҷоратӣ ва фарматсевтии Гансу иштирок намуда, молу маҳсулоти худро ба намоиш гузоштаанд.
Намоишгоҳи байналмилалии молҳои содиротии музофоти Гансу аз 15 то 17 сентябр идома ёфта, 16 сентябр дар меҳмонхонаи «Тоҷикистон» ҳамоиши доираҳои соҳибкории Гансу ва Тоҷикистон баргузор мегардад. Ҳадафи форуми мазкур таъмин ва таҳкими рушди муносибатҳои соҳибкориву иқтисодӣ байни Тоҷикистону Чин мебошад.