Ҷоми «Истиқлол»: ФФТ ва «Амонатбонк» -дар финал

Душанбе, 5.09.2016 /АМИТ «Ховар»/. Дар Варзишгоҳи марказии пойтахт мусобиқаи футболбозон оид ба футболи хурд бахшида ба 25- солагии Истиқлолият идома дорад.
Дар бозиҳои нимниҳоӣ шоми дирӯз дастаҳои ФФТ ва «Динамо» ба майдон баромаданд. Вохӯрии ин ду дастаи ба ҳам арзанда ниҳоят тезу тунд ва шавқовар гузашт. Футболбозони ҳар ду даста мехостанд дар ин вохӯрӣ аз якдигар қафо намонанд. Лаҳзаҳои хубу фаровони голзанӣ барои ҳуҷумкунандаҳои дастаҳо хеле зиёд ба мушоҳида расид, аммо аввалин шуда ба Эраҷ Носеҳов муяссар шуд, ки аз масофаи наздик тӯбро ба дарвозаи «Динамо» зада, дастаи Федератсияро ба сафи пеш барорад. Голи ҷавобӣ ба зудӣ зада шуд ва Сабур Бахтиҷамолзода муаллифи он гардид. Аммо дастаи Федератсияи футбол, ки дар ҳайаташ бозингарони ботаҷриба ҳунарнамоӣ доштанд, дар нимаи дуввум бо голҳои задаи Субҳон Хӯҷамов ва Ҳувайдо Давлатбеков аз нав ба сафи пеш баромада, дар ҷамъбаст бо ҳисоби 3 бар 1 ғалаба кард ва аввалин шуда, ба бозии ниҳоӣ роҳхат гирифт.
Дар бозии дувуми нимниҳоӣ тимҳои «Амонатбонк» ва «Бонки миллӣ» ба дидори ҳам рафтанд. Дар бозии баробар «Амонатбонк» бо натиҷаи 2 бар 1 ғалаба карда, ба бозии ниҳоӣ баромад.
Ба ҳамин тартиб дастаи Федерасияи футбол бо «Амонатбонк» барои мақоми аввал ва «Динамо» бо «Бонки миллӣ» барои ҷои сеюм рӯзи 7-уми сентябр вориди рақобат мешаванд.

Ёдрас мешавем, ки маблағи ҷоизавии мусобиқоти «Ҷоми Истиқлол» 70 000 сомониро ташкил медиҳад. Соҳиби ҷои аввал бо маблағи 40 000 сомонӣ, зинаи дуввум 20 000 ва зинаи сеюм бо 10 000 сомонӣ сарфароз мегардад.