Пажӯҳишгоҳи илмӣ- тадқиқотии фарҳанг ва иттилооти Вазорати фарҳанг зодаи истиқлол аст

Душанбе, 9.09.2016 /АМИТ «Ховар»/. «Пажӯҳишгоҳи илмӣ- тадқиқотии фарҳанг ва иттилооти Вазорати фарҳанги Ҷумҳурии Тоҷикистон бештар китобҳои тозанашреро, ки дар тӯли 5 соли охир ба табъ расидаанд, ба намоиш гузошт»,- гуфт директори Пажӯҳишгоҳи илмӣ- тадқиқотии фарҳанг ва иттилооти Вазорати фарҳанг Шариф Комилзода имрӯз зимни баргузории намоишгоҳ бахшида ба 25- солагии Истиқлолияти давлатӣ дар хиёбони Исмоили Сомонии пойтахт.

Ба гуфтаи Шариф Комилзода, намоишгоҳи имрӯза аз бисёр ҷиҳат хотирмон буда, бештари он таҷҳизоту ашё, китобу маҷалла ва рӯзномаҳое, ки ба намоиш гузошта шудааст, бозгӯкунандаи дастовардҳои даврони соҳибистиқлолии кишвар мебошанд.

«Пажӯҳишгоҳи илмӣ- тадқиқотии фарҳанг ва иттилооти Вазорати фарҳанг зодаи истиқлол буда, соли 1997 баъд аз ба имзо расидани Созишномаи умумии истиқрори сулҳ ва ризоияти миллӣ таъсис дода шудааст. Он дар тӯли наздик ба 20 соли фаъолияти худ беш аз 200 рисолаи илмӣ ва зиёда аз 1000 номгӯй мақолаҳоро доир ба масоили мубрами фарҳангу ҳунари миллӣ ба табъ расонид»,- иброз дошт директори ПИТФИ.