Пешвои миллат: «Бунёди муассисаҳои тандурустӣ, таъсиси корхонаҳои истеҳсолӣ ва дигар навкориҳо аз ҷумлаи дастовардҳои беназири даврони Истиқлолият мебошанд»

Душанбе, 26.09.2016. /АМИТ «Ховар»/. «Дар қаламрави ноҳияи Тоҷикобод 25 километр роҳҳои байналмилалӣ ва 100 километр роҳҳои дорои аҳаммияти маҳаллӣ мавҷуданд, ки қисми зиёди онҳо дар доираи лоиҳаи навсозии роҳи мошингарди Душанбе Саритош пурра таҷдид гардидаанд». Ин нуктаро Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон имрӯз зимни мулоқот бо сокинони ноҳияи Тоҷикобод зикр намуданд.
Роҳбари давлат бунёди муассисаҳои тандурустиву бунгоҳҳои тиббӣ дар марказ ва деҳоти ноҳия, таъсиси корхонаҳои истеҳсолӣ, ба истифода додани меҳмонхонаи боҳашамат, биноҳои маъмурию истиқоматӣ, таҷдиду навсозии роҳҳои маҳаллӣ, бунёди пулҳо ва боз чандин навкориҳоро аз ҷумлаи дастовардҳои беназири даврони Истиқлолият шумориданд.
Дар ноҳияи Тоҷикобод соҳаи маориф марҳила ба марҳила рушд менамояд.
Пешвои миллат дар робита ба ин таъкид намуданд, ки бо мақсади фароҳам овардани шароити замонавӣ барои таълиму тарбияи фарзандони мардум дар давоми солҳои соҳибистиқлолии кишвар дар ноҳияи Тоҷикобод 16 бинои нави таълимӣ ва синфхонаҳои иловагӣ барои қариб 6 ҳазор хонанда ба истифода дода шудаанд ва бунёди чандин бинову синфхонаҳои иловагӣ дар назди мактабҳои ноҳия идома дорад.