Сафари устодону донишҷӯёни Донишгоҳи Қувайт ба вилояти Суғд

Душанбе, 10.09.2016 /АМИТ «Ховар»/. Бо мақсади таҳкими дӯстӣ ва густариши робитаҳо як гурӯҳ ҳайати устодон ва донишҷӯёни Донишгоҳи Қувайт ба вилояти Суғд ташриф оварданд.
Тавре аз Хадамоти матбуоти раиси вилояти Суғд ба АМИТ «Ховар» иттилоъ доданд, дар доираи сафар меҳмонон аз Донишгоҳи давлатии Хуҷнд ба номи академик Бобоҷон Ғафуров боздид ба амал оварданд.
Абдулҳадӣ ал-Аҷмӣ, роҳбари ҳайат, ёвари декани таърихи Донишгоҳи Кувайт дар мулоқот бо устодону донишҷӯёни ДДХ ба номи академик Бобоҷон Ғафуров гуфт, ки 8 нафар устод ва 2 нафар донишҷӯи донишгоҳ бо даъвати Ҳукумати Ҷумҳурии Тоҷикистон ташриф овардаанд ва ҳадафи эшон омӯзиш, таҳқиқ ва ташфиқу тарғиби таърихи куҳан ва имрӯзаи халқи тоҷик мебошад.
Роҳбари ҳайат афзуд, ки мо дар оянда сайъ хоҳем намуд, ки ҳамкории самимӣ ва судовар ба роҳ монем. Дар чаҳорҷубаи ҳамкорӣ мо ҳавасманди омӯзиш, таҳқиқ ва нашри таърихи миллати тоҷик бо забони арабӣ ҳастем. То ин ки олами араб аз вуҷуд ва мероси гаронбаҳои халқи тоҷик бархӯрдор гардад.
Инчунин Анвар Мақсудӣ, ректори ДДХ ба номи академик Бобоҷон Ғафуров зикр намуд, ки устодони факултетҳои таърих ва забонҳои шарқ метавонанд дар ҳамкорӣ бо устодони Донишгоҳи Қувайт барои муаррифии таърих ва фарҳанги миллати тоҷик силсилаи китобҳои илмиву публитсистиро таҳия ва ба нашр расонанд. Зеро забони арабӣ яке аз забонҳои сатҳи ҷаҳонӣ аст ва ба ин васила тарғиби таърихи халқи тоҷик дар олами араб шоистаи дастгирӣ ва таҳсин аст.
Бояд қайд намуд, ки устодон ва донишҷӯёни Донишгоҳи Қувайт пеш аз сафар ба Донишгоҳи давлатии Хуҷанд ба номи академик Бобоҷон Ғафуров аз Самарқанду Бухоро боздид ба амал оварданд. Ҳамчунин аз ҷойҳои таърихиву фарҳангии шаҳри Хуҷанд дидан намуда.