Ситоиши либоси миллии тоҷикӣ дар расонаи мисрӣ

Душанбе, 19.09.2016 /АМИТ «Ховар»/. Рӯзномаи мисрии «Садо-л-балад» дар торнамои худ маводи хабарнигор Ало ал-Мунёвиро зери унвони «Либоси миллии тоҷикӣ дар ҷашни Истиқлол мисриёнро мафтун кард» мунташир намуд. Тарҷумаи маводи мазкурро пешниҳоди хонандагони худ менамоем:

«Либоси миллии тоҷикӣ дар ҷашни Истиқлол мисриёнро мафтун кард. Теъдоди зиёди мисриён хостанд ба бар кардани либоси миллии суннатии мардуми тоҷикро таҷриба кунанд. Либоси мазкур онҳоро дар зиёфати расмие, ки Сафорати Тоҷикистон дар Қоҳира дар яке аз меҳмонхонаҳои Қоҳира ба муносибати ҷашни Истиқлол баргузор намуд ва дар он наворбардорони рӯзномаи «Садо-л-балад» ширкат карданд, мафтун намуд.
Тоҷикистон ба Истиқлоли миллӣ 9 сентябри 1991 ноил шуд ва бино ба маълумоте, ки мо аз Сафорат ба даст овардем, мардуми тоҷик либоси миллии хос дорад, ки рангҳои пурнур ва навъҳои он дар минтақаҳои гуногуни кишвар фарқ мекунанд. Тоҷикон бо ҳунари ороишгарӣ, кандакорӣ ва зардӯзӣ шуҳрат доранд. Ҳунари зардӯзӣ ба таври возеҳ дар либоси миллии онҳо, ки пур аз хатту нахҳои заррин аст, ба мушоҳида расида, ба ин либоси миллӣ намуди нотакрор медиҳад».