3110 нафар занони хатлонӣ дар бахши ҳунарҳои мардуми фаъолият доранд

Қурғонтеппа, 22.10.2016 /АМИТ «Ховар»/. Дар вилояти Хатлон ба  масъалаҳои шуғли занон  диққати ҷиддӣ  дода  мешавад. Дар  вилоят ҷиҳати мусоидат намудан ба ин масъала Муассисаи давлатии «Маркази таълими калонсолон» таъсис ёфта, 9 филиали он дар шаҳру ноҳияҳои Қӯрғонтеппа, Кӯлоб, Ёвон, Қубодиён, Дӯстӣ, Фархор, Данғара, Темурмалик ва Шамсиддини Шоҳин фаъолият намуда, аз рӯи асосҳои омӯзишии компютерӣ, дӯзандагӣ ва муҳосибӣ ба занону духтарон касб меомӯзонанд.
Дар шаҳру ноҳияҳои вилояти Хатлон бо дастгирии соҳибкорони ватанӣ ва иттиҳодияҳои ҷамъиятӣ гурӯҳҳои пазандагӣ, дӯзандагӣ, зардӯзӣ, гулдӯзӣ, чакандӯзӣ, кӯрпадӯзӣ, қолинбофӣ, намадбофӣ, гилембофӣ, ҷӯроббофӣ ва гаҳворасозӣ ташкил карда шуда, 3110 нафар занону бонувони хонанишин бо истифодаи ҳунарҳои мардумӣ машғули кор мебошанд.