«Қабул ба сафи донишҷӯён ва супоридани калиди рамзӣ»- маҳфили фарҳангӣ дар ФДДМ дар шаҳри Душанбе
![](https://khovar.tj/wp-content/uploads/2016/10/Student.jpg)
Душанбе, 26.10.2016 / АМИТ «Ховар»/. Дирӯз, 25 октябр дар Филиали Донишгоҳи давлатии Маскав ба номи М. Ломоносов дар шаҳри Душанбе маҳфили фарҳангии «Қабул ба сафи донишҷӯён ва супоридани калиди рамзӣ» баргузор гардид. Дар маҳфил донишҷӯёни курси якум иштирок намуда, донишу маҳорат ва ҳунари худро ба донишҷӯёни курсҳои болоӣ ва устодон нишон доданд.
Тавре Робия Қурбонова, сардори шуъбаи тарбияи Филиали ДДМ дар шаҳри Душанбе иброз дошт, барномаи анъанавӣ ва фарҳангии «Қабул ба сафи донишҷӯён ва супоридани калиди рамзӣ» ҳамасола дар Филиали Донишгоҳи мазкур доир мегардад.
Ҳадаф аз баргузории маҳфили мазкур- ин муттаҳид намудани донишҷӯён ва ҷалби онҳо ба корҳои ҷамъиятиву фарҳангӣ мебошад.