«Ҳамоҳангии минтақавӣ» намояндагони Қувваҳои мусаллаҳро ба ҳам овард

Душанбе, 26.09.2016 /АМИТ «Ховар»/. Дар маркази омӯзишии «Кемп Эдвардс», воқеъ дар пойгоҳи низомии Кейп-Код (иёлати Массачусетси Штатҳои Муттаҳидаи Амрико бо иштироки гурӯҳҳои фаврӣ ва намояндагони Қувваҳои Мусаллаҳи Штатҳои Муттаҳидаи Амрико, ҷумҳуриҳои Тоҷикистон, Қазоқистон, Қирғизистон, Муғулистон ва Покистон машқҳои васеи муштараки ҳарбӣ таҳти унвони «Ҳамоҳангии минтақавӣ» доир гардиданд.
Намояндагони низомии давлатҳои иштирокдор нахуст бо макони баргузории машқҳо ва ҳадафу моҳияти он шинос шуданд. Аз рӯи матлаби баргузории машқҳои муштарак гӯё дар қаламрави яке аз давлатҳои минтақа бо вуҷуди имзои созишномаи сулҳ миёни ҳокимияти қонунӣ ва гурӯҳҳои ҷудоихоҳ муноқишаҳои дохилӣ идома дошта, кишварро вазъи печидаи ҳарбӣ-сиёсӣ фаро гирифтааст.
Вобаста ба ин, иштирокчиёни машқҳо дар 4 марҳила тамоми ҷанбаҳои ҳолати бавуҷудомадаро дар ҳамбастагӣ омӯхта, роҳу воситаҳои расонидани кумак ва дар ин замина ба эътидол овардани субот дар ин кишварро муайян намуданд.
Тавре ки аз Вазорати мудофиаи Ҷумҳурии Тоҷикистон хабар доданд, ҳадаф аз ташкилу роҳандозии машқҳои муштараки низомӣ аз як тараф, такмилу тақвият бахшидани қувва ва воситаҳои низомии кишварҳои минтақа ҳангоми таҳдиду хатарҳои эҳтимолии террористию экстремистӣ ва рух додани ҳолатҳои фавқулода ва аз тарафи дигар, мустаҳкам намудани ҳамоҳангии фаврии иттилоотӣ дар ин гуна ҳолатҳо бо ҳамдигар мебошад.
Инчунин дар ҳамбастагӣ ба эътидол овардани буҳронҳои сиёсӣ дар заминаи ҳадафҳои сулҳхоҳонаи кишварҳои иштирокдор низ яке аз ҳадафҳои ин машқҳо буд.