Дар ноҳияи Ёвон ба муқаддасоти миллӣ арҷ мегузоранд

Ёвон, 26.10.2016 /АМИТ «Ховар»/. Амирбеки Темур, раиси ноҳияи Ёвон дар ҷамъомади Шуъба оид ба корҳои дин, танзими анъана ва ҷашну маросимҳои миллии Мақомоти иҷроияи ҳокимияти давлатии ноҳия оид ба дастовардҳои даврони истиқлолият, аҳамият ва моҳияти сулҳу ваҳдат иброз дошт, ки «давлатҳои дунё дар тўли таърих барои имрўзиён аз сарнавишти худ сабақи бой ба мерос гузоштаанд. Аз саҳифаҳои таърихи давлатдории тоҷикон ва дигар халқҳои олам бармеояд, ки давлатҳои мутараққӣ ва рў ба пешравӣ маҳз дар асоси якдигарфаҳмӣ, тамаддун, ваҳдат ва эҳтироми қонунҳо ба дастовардҳо ноил гардида, амнияти шаҳрвандони худро таъмин кардаанд».
Тавре аз Мақомоти иҷроияи ҳокимияти давлатии ноҳияи Ёвон ба АМИТ «Ховар» хабар доданд, ҷамъомади мазкур бо мақсади баланд бардоштани фарҳанги миллии занону модарон, пешгирии бегонапарастӣ, арҷ гузоштан ба муқаддасоти миллӣ, ҷалб намудани ҷавонон ба тарзи ҳаёти солим ва пешгирии амалҳои номатлуб дар ҷомеа барпо гардид.