Хуҷанд: Муассисаҳои тандурустӣ ба зимистон омодаанд

Хуҷанд, 11.10.2016 /АМИТ «Ховар»/. Дар муассисаҳои тиббии маркази вилояти Суғд-шаҳри Хуҷанд барои сари вақт омода намудани соҳаҳои иқтисодиёт ва иҷтимоиёти ҷумҳурӣ барои фаъолияти мунтазам ва самарабахш дар давраи тирамоҳу зимистони солҳои 2016-2017 корҳои назаррас ба анҷом мерасанд. Дар ин бора масъулин аз мақомоти иҷроияи ҳокимияти давлатии шаҳр ба хабарнигори АМИТ «Ховар» иттилоъ доданд,
Ширкати ҶДММ «Баракат», воқеъ дар ноҳияи Б.Ғафуров муасисаҳои тиббии шаҳрро дар умум бо 555 тонна ангишт таъмин кард. Аз ҷумла, аз ҷониби Беморхонаи клиникавии №1- 235 тонна, Беморхонаи шаҳрии №2 — 175 тонна ва Таваллудхонаи шаҳрӣ — 145 тонна ангишт харид шуда, инчунин БКШ №1 бо 3 адад, БКШ №2 бо 2 адад, Беморхонаи сирояткунандаи шаҳр бо 2 адад, таваллудхонаи шаҳрӣ бо 2 адад ва Маркази саломатии №5 бо 1 адад, дар умум бо 10 генератор таъмин карда шуданд.
Ҳамзамон дар ҳамаи муассисаҳои тандурустии шаҳр истифодаи пурраи лампаҳои каммасраф ҷорӣ карда шуда, шишабандии оинаҳо низ гузаронида шуд. Гармкунакҳои барқӣ омода карда шуда, трансформаторҳои барқӣ санҷида шуданд. Ҳамаи муассисаҳои тандурустӣ бо сипарҳову лавозимоти зиддисӯхтор таъмин карда шуда, ҳамчунин бо кормандони муассисаҳои тиб оид ба қоидаҳои бехатарии зидди сӯхтор ва истифодаи қувваи барқ омӯзишҳои иловагӣ гузаронида шуданд.