«Истиқлолият ва сиёсати давлатӣ дар бораи забон»-конфронси илмию амалӣ

Душанбе, 03.10.2016. /АМИТ «Ховар»/. 4-уми октябри соли равон бо ибтикори Кумитаи забон ва истилоҳоти назди Ҳукумати Ҷумҳурии Тоҷикистон дар Муассисаи давлатии «Академияи воситаҳои ахбори оммаи Тоҷикистон» конфронси илмию амалии ҷумҳуриявии «Истиқлолият ва сиёсати давлатӣ дар бораи забон» баргузор мегардад.
Дар конфронс раиси Кумитаи забон ва истилоҳоти назди Ҳукумати Ҷумҳурии Тоҷикистон Гавҳар Шарофзода, Ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа Абдуҷаббор Раҳмонзода, директори Институти забон, адабиёт, шарқшиносӣ ва мероси хаттии ба номи Рӯдакии Академияи илмҳои Тоҷикистон Сахидод Раҳматуллозода сухан мегӯянд.
Инчунин дар конфронси мазкур Сайфиддин Назарзода дар мавзӯи «Забони тоҷикӣ ганҷи шоёни миллат аст», Назрӣ Офаридаев дар мавзӯи «Забони давлатӣ ва билингвизм», Туғрал Шокиров оид ба «Рушди забони тоҷикӣ дар замони истиқлолияти давлатӣ» ва дигарон маърӯза мекунанд.