Китоби «Созшиносӣ»-и Хуршед Низомов ба дасти хонанда расид

Душанбе, 11.10.2016. /АМИТ «Ховар»/. Муассисаи нашриявии «Адиб» китоби Хуршед Низомовро таҳти унвони «Созшиносӣ» ба нашр расонид.
Дар китоб дар бораи таснифоти созҳои миллии тоҷик, марҳилаҳои ташаккул, раванди омодасозии созҳои мусиқӣ ва рисолаҳои мусиқӣ маълумоти пурра дода шудааст.
Қаблан, аз ҷониби Сарредаксияи илмии «Энсиклопедияи миллии тоҷик» китоби «Созҳои мусиқии тоҷик ва ҳунари созтарошӣ»-и Хуршед Низомов нашр гардид, ки дар он вобаста ба навсозӣ (реконструксия)-и созҳои миллӣ, таърихи ташаккули аввалин дастаҳои касбии ҳунарӣ ва мактабу омӯзишгоҳҳо дар мамлакат, ансамблу оркестрҳои созҳои миллӣ ва инкишофи санъати касбии тоҷик маълумот дода шуда буд.
Китоби «Созшиносӣ» зери назари номзади илмҳои педагогӣ Шариф Комилзода таҳия гардида, муҳаррири илмӣ номзади илмҳои таърих Абубакр Зубайдов ва муқарризи китоб Арбоби ҳунари Ҷумҳурии Тоҷикистон, профессор Ҷӯрахон Обидпур мебошанд.
Дар ин бора аз Вазорати фарҳанги ҶТ хабар доданд.