«Ҷоми Президенти Тоҷикистон» ба Украина бурда шуд

Душанбе, 6.10.2016. /АМИТ «Ховар»/. Мусобиқаи IV байналмилалӣ оид ба дзюдо барои дарёфти «Ҷоми Президенти Ҷумҳурии Тоҷикистон» бо пирӯзии паҳлавони украинӣ Станислав Бондаренко хотима ёфт. Ҷои дуюмро варзишгари кубагӣ Гарсия Мендоза ва ду ҷои сеюмро паҳлавонони ӯзбекистонӣ Муҳсин Кисомиддинов ва Абдулло Тангриев ба даст оварданд.
Дар расми ифтитоҳи мусобиқа раиси шаҳри Ваҳдат Раҳмоналӣ Амирзода ва муовини раиси Кумитаи ҷавонон, варзиш ва сайёҳӣ Дилшод Назаров ба варзишгарон барор хостанд.
Дар мусобиқа, ки дирӯз, 5 октябр дар Варзишгоҳи «Хайр»-и шаҳри Ваҳдат баргузор гардид, 45 варзишгар аз ҷумҳуриҳои Афғонистон, Беларус, Италия, Непал, Куба, Озарбойҷон, Покистон, Русия, Ӯзбекистон, Украина, Ҷопон, Эрон, Қазоқистон, Қирғизистон ва Тоҷикистон ширкат доштанд.
Мусобиқаро доварони сатҳи ҷаҳонӣ аз Афғонистон, Ӯзбекистон ва Тоҷикистон ҳакамӣ намуданд.
Ғолиби ҷои аввали мусобиқа соҳиби 56 ҳазор сомонӣ, ҷои дуюм 32 ҳазор сомонӣ ва ҷои сеюм сазовори 16 ҳазор сомонӣ гардиданд. Ҳамзамон ба ғолибон Сипоснома ва туҳфаҳои хотиравӣ тақдим карда шуд.