Раиси ИЖТ бо журналистони Суғд перомуни масоили марбут ба ВАО суҳбат кард

Душанбе, 14.10.2016. /АМИТ «Ховар»/. Дирӯз раиси Иттифоқи журналистони Тоҷикистон Зинатулло Исмоилзода бо мақсади шиносоӣ бо шароити кор ва масоили мухталифи марбут ба соҳаи воситаҳои ахбори оммаи вилояти Суғд дар «Кохи матбуот»-и шаҳри Хуҷанд бо намояндагони ин соҳа мулоқот намуд.
Зиннатулло Исмоилзода бо рӯзноманигорони нашрияҳои «Ҳақиқати Суғд», «Согдийская правда», «Суғд ҳақиқати», «Дам» ва «Саломат бошед» перомуни шароити кор ва фаъолияти касбии рӯзноманигорон суҳбат орост.
Раиси Иттифоқи журналистони Тоҷикистон изҳор намуд, ки ҳадафи вохӯрӣ бо журналистон, пеш аз ҳама, рушду таҳкими журналистика ва вусъати ҳамкорӣ байни воситаҳои ахбори омма мебошад.
«Алҳол замона тақозо дорад, ки рақобатпазирӣ ва амнияти итилоотии ВАО дар мадди аввал бошад. Бояд рӯзноманигорон дар маводи хеш муаммову мушкилоти мардумро инъикос намуда, раҳнамои ҷамъият бошанд. Маҳз ҳамкории муфид метавонад амнияти иттилоотиро ба вуҷуд орад», -иброз дошт З.Исмоилзода.
Дар ин бора аз Мақомоти иҷроияи ҳокимияти давлатии вилояти Суғд ба АМИТ «Ховар» хабар доданд.