«Танзим ва ҳамгунсозии истилоҳоти соҳаи ҷарроҳӣ дар забони тоҷикӣ»

Душанбе, 11.10.2016 /АМИТ «Ховар»/. «Танзим ва ҳамгунсозии истилоҳоти соҳаи ҷарроҳӣ дар забони тоҷикӣ»- таҳти ин унвон дар Донишгоҳи давлатии тиббии Тоҷикистон ба номи Абӯалӣ ибни Сино семинари илмию назариявӣ баргузор гардид.
Дар ҷамъомади илмӣ устодон ва профессорҳо аз ДДТТ ба номи Абӯалӣ ибни Сино иштирок дошта, оид ба истилоҳоти тиббии забони тоҷикӣ, дар бораи мушкилоти истилоҳсозии соҳаи ҷарроҳӣ дар забони тоҷикӣ, тарҷумаи истилоҳоти тиббӣ ва душвориҳои ин самт ва тарҷумаи истилоҳоти соҳаи ҷарроҳӣ изҳори ақида намуданд.
Иштирокчиён зикр намуданд, ки солҳои охир оид ба тарҷумаи истилоҳоти тиббии тоҷикӣ корҳои зиёд ба анҷом расонида шуданд, якчанд китобу дастурҳо ва фарҳангҳои тиббиро бо забони давлатӣ нашр гардиданд. Вале дар ин самт ҳоло ҳам мушкилиҳо ба назар мерасанд. Мутахассисон дар амалияи тиб, ҳангоми гузаронидани лексияҳо, машғулиятҳои амалӣ бо душвориҳои забонӣ дучор меоянд. Дар ин самт гуногунрангии истилоҳоти тиббӣ ба назар мерасад. Бояд дар якҷоягӣ бо мутахассисон истилоҳоти тиббиро ба танзим дароварда, луғати истилоҳоти тиббии соҳаи ҷарроҳиро таҳия намоем,-зикр намуданд иштирокчиён.
Ҳамчунин зикр гардид, ки дар истифодаи истилоҳоти тиббии забони тоҷикӣ бештар гуногунрангии истилоҳот ва тарҷумаи нодурусти истилоҳот ба назар мерасад.
Дар семинари мазкур қарор қабул карда шуд, ки бо мақсади ба танзим даровардани истилоҳоти тиббӣ аз ҳисоби мутахассисони соҳа гурӯҳи корӣ ташкил карда шуда, истилоҳоти бахшҳои гуногун баъди омӯзиш ва муҳокима мавриди истифода қарор гиранд.
Дар ин бора аз ДДТТ ба номи Абӯалӣ ибни Сино иттилоъ доданд.