Тоҷикистон дар рейтинги нави Федератсияи байналмилалии футбол 4 зина боло рафт

Душанбе, 20.10.2016 /АМИТ «Ховар»/. Дастаи мунтахаби  Тоҷикистон оид ба футбол дар радабандии  нави ФИФА, ки имрӯз интишор шуд,  чор зина боло рафта, дар мақоми 140-ум қарор гирифт. Тими мунтахаби кишварамон соҳиби  227 имтиёз буда,  дар қиёс бо моҳи гузашта  шумораи имтиёзҳояшро 7 адад бештар кард.
Ёдрас бояд шуд, ки аз замони нашри рейтинги қаблӣ, футболбозони мо  як вохӯрии рафиқонаро  бо дастаи мунтахаби Фаластин анҷом доданд ва ин дидор бо ҳисоби 3 бар 3 мусовӣ анҷом ёфт. Барои ин натиҷа  дастаи мунтахаби футболи кишвар соҳиби  69 имтиёз гардид.
Дар миёни дастаҳои Осиё футболи мо мисли пешин дар мақоми 24-ум мавқеъ гирифтааст.  Дар садри ҷойгузории дастаҳои  қораи Осиё тағйирот ба чашм намерасад ва мақоми аввал насиби тими миллии Эрон буда, Австралия ва Кореяи Ҷанубӣ зинаҳои дуюм ва сеюмро мутаносибан аз худ кардаанд.
Ёдрас мешавем, ки дар моҳи ноябри соли равон дастаи мунтахаби Тоҷикистон боз ду бозии байналмилалии санҷиширо бо дастаҳои миллии Туркманистон ва Афғонистон анҷом медиҳад, ки натиҷаи ин вохӯриҳо ба нуфузи дастаи мунтахаби кишвар дар моҳи оянда таъсиргузор хоҳад буд.
Бино ба иттилои Федератсияи футболи мамлакат  ҳарду вохӯрӣ дар Варзишгоҳи марказии ҷумҳуриявӣ баргузор мешаванд.