Вазири нақлиёт: «Дар доираи табиқи лоиҳа кӯчонидани хонаҳои истиқоматӣ пешбинӣ нашудааст»
Душанбе, 19.10.2016/АМИТ «Ховар»/. «Дар доираи татбиқи лоиҳаи беҳтар намудани роҳи мошингарди Душанбе-сарҳади Ӯзбекистон аз минтақаи ҳайкали Абӯалӣ ибни Сино то дарвозаи ғарбии Душанбе кӯчонидани хонаҳои истиқоматӣ пешбинӣ нашудааст»,- гуфт имрӯз дар назди вакилони палатаи поёнии Парлумони мамлакат Шералӣ Ганҷалзода, вазири нақлиёти Ҷумҳурии Тоҷикистон. Мавсуф афзуд, ки дар чаҳорчӯбаи татбиқи лоиҳаи мазкур барои ба дигар ҷо кӯчонидани хатҳои муҳандисӣ аз шаҳраки 82-и пойтахт 1 миллиону 300 ҳазор доллари амрикоӣ зарур аст. Бояд тазаккур дод, ки 19 октябр вакилони Маҷлиси намояндагон Созишномаи қарзӣ байни Ҷумҳурии Тоҷикистон ва Бонки осиёии сармоягузориҳои инфрасохторӣ /БОСИ/ оид ба лоиҳаи таҷдиди роҳи мошингарди Душанбе-сарҳади Ӯзбекистонро ба тасвиб расониданд.
Меҳринамо Ҷонмаҳмадова, муовини вазири молияи ҷумҳурӣ зимни тавзеҳи санади мазкур гуфт, ки маблағи умумии лоиҳаи таҷдиди роҳи мошингарди мазкур 90 миллион доллари амрикоӣ буда, он аз ҷониби Бонки аврупоии таҷдид ва рушд /БАТР/ 62,5 миллион $ ва БОСИ 27,5 миллион доллар маблағгузорӣ карда мешавад. Санади мазкур 25 июни соли 2016 дар Пекин ба имзо расонида шудааст. Агентии иҷроияи лоиҳа Вазорати нақлиёти Ҷумҳурии Тоҷикистон ва татбиқкунандаи он Маркази татбиқи лоиҳаҳои таҷдиди роҳҳо мебошад.
Беҳтар намудани ҳолати роҳи мошингард, хизматрасонии нақлиётӣ, таъмини бехатарии ҳаракати нақлиёт ва пиёдагардон ҳадафи асосии лоиҳа аст. Дар доираи лоиҳа барқароркунии қитъаи роҳ аз ҳайкали Абӯалӣ Сино то дарвозаи ғарбии Душанбе аз км 0 то км 4,6 бо паҳноии аз 70 то 90 метр, ҳаракати 8- хатаи нақлиёт ва чор хати иловагӣ барои ҳаракати нақлиёти мусофирбар ва навсозии чорроҳаи назди ҳайкали Абӯалӣ ибни Сино ва шаҳраки 82 дар сатҳи гуногун пешбинӣ шудааст. Татбиқи лоиҳаи мазкур соли 2016 оғоз гардида, то охири соли 2020 ба анҷом расонида хоҳад шуд.








МегаФон Тоҷикистон: МегаҚувва гигабайтҳоро дучанд менамояд
Имрӯз дар водиҳои Тоҷикистон ҳаво то 22 дараҷа гарм мешавад
Ҳамкории Тоҷикистон ва Созмони ҳамкории иқтисодӣ баррасӣ гардид
Дар Кумитаи хоҷагии манзилию коммуналӣ бахшида ба Рӯзи Президент чорабинии тантанавӣ баргузор гардид
Дар шаҳри Панҷакент маркази хизматрасонӣ ва тарабхона ба истифода дода шуд
Дар Кӯлоб барои омодагӣ ба ҳолатҳои фавқулода ҷаласа доир шуд
Бахшида ба Рӯзи Президент дар шаҳри Бӯстон Рӯзи дарҳои кушод доир гардид
ПАНҶАКЕНТИ ҚАДИМ. Оид ба омӯзиши он конференсияи илмӣ баргузор шуд
Дар шаҳри Панҷакент фаъолияти корхонаҳои саноатӣ тақвият меёбад






