Дастаи мунтахаби бонувони Тоҷикистон барои роҳхат ба бозиҳои ниҳоии Чемпионати Осиё мубориза мебарад

Душанбе, 18.11.2016 /АМИТ «Ховар»/. Дастаи мунтахаби бонувони Тоҷикистон соли оянда дар мусобиқаи интихобии Чемпионати Осиё-2018 бори нахуст расман ширкат меварзад. Ин бозиҳо аз 3-юм то 12 апрел гузаронида мешаванд.
Дар қатори дастаи мунтахаби Тоҷикистон ҳамчунин дастаҳои Кореяи Ҷанубӣ, Таиланд, Ветнам, Урдун, Мянма, Тайбейи Чин, Ӯзбекистон, Филиппин, Гонконг, Лубнон, Баҳрайн, Эрон, Ҳиндустон, Фаластин, Ҷумҳурии Халқӣ-Демократии Корея, Гуам, Ироқ, Сингапур, Сурия ва Амороти Муттаҳидаи Араб иштирок мекунанд.
Дастаи мунтахаби Урдун новобаста ба натиҷаҳои бозиҳои интихобӣ, ҳамчун мизбони Чемпионати Осиё -2018 дар бозиҳои ниҳоӣ ширкат меварзад.
Қуръакашии бозиҳо 20-уми январ дар пойтахти Урдун-шаҳри Уммон гузаронида мешавад. Аз рӯи натиҷаи қуръакашӣ се гурӯҳ аз 5 даста ва як гурӯҳ аз 6 даста таркиб меёбанд. Аз ҳар гурӯҳ дастаи ғолиб ба бозиҳои ниҳоӣ роҳхат мегирад.
Бозиҳои интихобӣ дар кишварҳои Ветнам, Фаластин ва Ҷумҳурии Халқӣ-Демократии Корея гузаронида мешаванд.
Ба ғайр аз мизбони мусобиқот-дастаи мунтахаби Урдун ба бозиҳои ниҳоии Чемпионати Осиё-2018 се дастаи муқтадири кишварҳои Осиё- Япония, Австралия ва Чин, ки дар Чемпионати Осиё дар соли 2014 се зинаи аввалро ишғол кардаанд, мустақиман роҳхат ба даст овардаанд.