Логопед: «Ба мо бештар кӯдакони томактабӣ муроҷиат мекунанд»

Душанбе, 14.11.2016 /АМИТ «Ховар»/. 14 ноябр дар тамоми ҷаҳон Рӯзи байналмилалии логопед ҷашн гирифта мешавад. Логопед мутахассисест, ки ба кӯдакон ва калонсолони дорои мушкилӣ дар нутқ кумак мерасонад. Хабарнигори АМИТ «Ховар» бо Фотима Бобохоҷаева, духтури логопеди шуъбаи барқароркунии шунавоии овоз ва нутқи Маркази миллии тиббии Ҷумҳурии Тоҷикистон дар мавриди мушкилоти ин соҳа ҳамсуҳбат гардид.
«40 сол мешавад, ки дар ин соҳа кор мекунам. Дар тӯли фаъолиятам ҳам кӯдакон ва ҳам калонсолон вобаста ба душвориҳои гуногун дар нутқашон ба назди мо меоянд»,- зикр намуд Ф. Бобохоҷаева.
Мусоҳиб изҳор намуд, ки бо ин мушкилӣ бештар кӯдакони томактабӣ, кӯдаконе, ки то 3-4- солагӣ тамоман гап намезананд ва лакнати забон доранд, муроҷиат мекунанд.

«Бештари онҳоро баъди ба мактаб додан муаллимаҳо ба назди мо равон мекунанд. Хуб мешуд, ки ҳар як падару модар пеш аз ба мактаб рафтани фарзандонашон ба мутахассиси логопед муроҷиат кунад, то кӯдак дар мактаб ба мушкилӣ рӯ ба рӯ нашавад»,- гуфт мутахассис.
«Ба мо калонсолон низ муроҷиат мекунанд,-гуфт Ф. Бобохоҷаева ва афзуд, ки онҳо бештар пас аз гузаронидани бемориҳои сактаи мағзи сар, саратон, ҳамчунин пас аз хӯрдани зарбаҳои гуногун, ки боиси дар нутқашон пайдо шудани нуқс мегардад, муроҷиат мекунанд»,-илова намуд мутахассис.
Ба иттилои Ф. Бобохоҷаева, дар давоми 9 моҳи соли равон ба Марказ беш аз 487 нафар бо ин мушкилӣ муроҷиат кардаанд.
Бояд зикр кард, ки Рӯзи байналмилалии логопед аз 14 ноябри соли 2004-ум инҷониб таҷлил мешавад.