Масъалаҳои ҳалталаби рушди қутоспарварӣ

Душанбе, 10.11.2016. /АМИТ «Ховар»/. Дар шаҳраки Зарафшони ноҳияи Айнӣ бо иштироки гурӯҳи зиёди кормандон ва роҳбарони хоҷагиҳои деҳқоние, ки дар минтақаҳои Кӯҳистони Мастчоҳ ва ноҳияи Айнӣ ба қутоспарварӣ машғуланд, конфронси илмию амалӣ — минтақавӣ дар мавзӯи «Масъалаҳои ҳалталаби рушди қутоспарварӣ» баргузор гардид. Дар ин бора аз мақомоти иҷроияи маҳаллии ҳокимияти давлатии вилояти Суғд ба АМИТ «Ховар» хабар доданд.
Мансур Носиров, сардори Раёсати кишоварзии ноҳияи Айнӣ чунин изҳор дошт: «Масъулини соҳа баҳри амалисозии қарори Ҳукумати Ҷумҳурии Тоҷикистон «Дар бораи тасдиқи «Барномаи рушди соҳаи қутоспарварӣ дар Ҷумҳурии Тоҷикистон барои солҳои 2008-2015» тадбирҳои мушаххасро амалӣ намуданд».
Номбурда инчунин афзуд, ки «таҳлилҳо собит сохтанд, ки таи ҳашт соли охир дар ҳоҷагиҳои гуногунсохтори ноҳия миқдори қутосҳо аз 485 сар то ба 1003 сар расонида шуда, истеҳсоли гӯшти қутос аз 167 сентнер ба 560 сентнер афзудааст»
Ёдовар мешавем, ки конфронси мазкур бо ташаббуси Вазорати кишоварзӣ, Академияи илмҳои кишоварзӣ ва Институти чорводории Ҷумҳурии Тоҷикистон бо мақсади рушди қутоспарварӣ дар Тоҷикистон, бахусус дар водии Зарафшон баргузор карда шуд.